«Ամերիկայի ձայնի» փոխանցմամբ, Քենիայի բանակը հայտնել է Սոմալիի կառավարական ուժերի հետ համատեղ իրականացված գործողությունների արդյունքում «ալ-Շաբաբ»-ի զինյալներից երկրի հարավային քաղաքներից մեկն ազատելու մասին:
Գործակալությունը տեղեկացնում է, որ սոցիալական Twitter կայքում չորեքշաբթի օրը հրապարակված հաղորդագրությունում Քենիայի բանակի խոսնակ Էմանուել Չիրչիրը հայտնել է Ֆաֆադուն քաղաքն ազատագրելու մասին: Չիրչիրի համաձայն, զինյալներից քաղաքի ազատագրման գործողության իրականացման ընթացքում ոչնչացվել է «ալ-Շաբաբ»-ի երեք զինյալ:
Քենիայի բանակի խոսնակի համաձայն, «ալ-Շաբաբ»-ի ոչնչացված զինյալների թվում է եղել Գեդո տարածաշրջանում խմբավորման առաջնորդ շեյխ Հասան Հուսեյնը:
Քաղաքի ազատագրման գործողության ընթացքում թեթև վնասվածքներ է ստացել Քենիայի բանակի մեկ զինծառայող:
«Ամերիկայի ձայնը» հիշեցնում է, որ Քենիայի զինված ուժերը մուտք են գործել Սոմալիի տարածք անցյալ տարվա հոկտեմբերի ամսին՝ այս երկրի կենտրոնում և հարավում մեծ տարածքներ վերահսկող «ալ-Շաբաբ» խմբավորումը հետ մղելու նպատակով: Քենիան զինյալների այս խմբավորումը մեղադրել է մարդկանց միջսահմանային առևանգմամբ զբաղվելու մեջ:
