Ռեժիսոր Մարտին Սկորսեզեն արժանացել է Բրիտանական կինոյի և հեռուստատեսության ակադեմիայի (BAFTA Fellowship Award) պարգևին: Այս մասին հայտնում է Reuters գործակալությունը:
«Մարտին Սկորսեզեն կենդանի լեգենդ է, ամբողջ աշխարհի երիտասարդ ռեժիսորների ոգեշնչման աղբյուր»,- հայտարարել է BAFTA-ի ներկայացուցիչ Թիմ Քորրին: Սկորսեզեի պարգևատրման արարողությունը տեղի է ունենալու 2012 թվականի փետրվարի 12-ին:
Մարտին Սկորսեզեի վերջին ֆիլմը Hugo-ն է: Ֆիլմը վարձույթի է հանվել 2011 թվականի վերջին: Այն Սկորսեզեի 3D ֆորմատով նկարահանված առաջին ֆիլմն է:
Բրիտանական կինոյի և հեռուստատեսության ակադեմիայի պարգևը հանձնվում է յուրաքանչյուր տարի՝ սկսած 1971 թվականից: Նրա հայտնի դափնեկիրներն են՝ Ալֆրեդ Հիչքոքը, Սթիվեն Սփիլբերգը, Ֆեդերիկո Ֆելինին, Չարլի Չապլինը, Շոն Քոներին, Վանեսա Ռեդգրեյվը և Թերրի Գիլյամը: