РИА Новости-ի փոխանցմամբ՝ կիրակի օրը՝ հունվարի 8-ին, մեկնարկում է Իրանի նախագահ Մահմուդ Ահմադինեժադի լատինաամերիկյան շրջագայությունը։
Վերջինս սկսվելու է Վենեսուելա այցելելով։ Կարակասում Ահմադինեժադը հանդիպում է ունենալու Վենեսուելայի նախագահ Ուգո Չավեսի հետ։ Հանդիպումը նվիրված կլինի երկու երկրների փոխհարաբերությունների ամրագրմանը։
Նշվում է, որ վերջին անգամ Ահմադինեժադը Վենեսուելա է այցելել 2009 թվականի նոյեմբերին։ Այն ժամանակ կնքվել է միանգամից 12 համաձայնագիր, որոնք վերաբերում են առևտրային, էներգետիկ, արդյունաբերական ու գյուղատնտեսական ոլորտներում երկու երկրների համագործակցությանը։
Վենեսուելայից բացի, Ահմադինեժադն այցելելու է նաև Նիկարագուա, Կուբա և Էկվադոր։ Լատինաամերիկյան շրջագայության ընթացքում Ահմադինեժադին ուղեկցելու են արտգործնախարար Ալի Աքբար Սալեհին, առևտրի, արդյունաբերության ու հանքարդյունաբերության նախարար Մեհդի Գազանֆարին և էներգետիկայի նախարար Մաջիդ Նամջոուն։