Newsru.com-ի փոխանցմամբ՝ Պենտագոնը պատասխանել է Իրանի այն սպառնալիքին, որ ամերիկացիներին սպասվում են տհաճություններ, եթե Պարսից ծոց վերադառնա ոչ վաղ անցյալում այնտեղից հեռացած ամերիկյան John C. Stennis ավիակիրը։
Պենտագոնի ներկայացուցիչ Ջորջ Լիթլը հայտարարել է. «Պենտագոնը շարունակելու է ավիակրային խմբավորում ուղարկել Հորմուզի նեղուց։ Պարսից ծոցի տարածաշրջանում շարունակվելու է ամերիկյան զինուժի ու միջոցների տեղակայումը, ինչպես որ եղել է տասնամյակների ընթացքում։
Ավիակրային խմբավորման ուղարկումը միտված է տարածաշրջանում անվտանգության ու կայունության, ինչպես նաև նախապես պլանավորված առաքելությունների շարունակականության ապահովմանը: Տվյալ դեպքում ԱՄՆ-ի գլխավոր առաջադրանքը Հորմուզի նեղուցով անվտանգ երթևեկության ապահովման երաշխավորումն է»։
ԱՄՆ պետդեպարտամենտի մամլո ծառայության ղեկավար Վիկտորիա Նուլանդն իր հերթին հայտարարել է, որ Իրանի կողմից նոր սպառնալիքները վկայում են այդ երկրի նկատմամբ սահմանված պատժամիջոցների գործելու մասին.
«Դրանով իսկ Թեհրանը փորձում է իր քաղաքացիների ուշադրությունը շեղել այն դժվարություններից, որոնց նա բախվում է։ Դա մասնավորապես վերաբերում է միջազգային պատժամիջոցների արդյունքում առաջացած տնտեսական խնդիրներին»։
The National Post-ը նշում է, որ այս օրերին իրանա-ամերիկյան լարվածությունը վերջին 20 տարիների համար հասել է իր գագաթնակետին։
