Հնդկաստանի դատարանը հրամայել է սոցիալական կայքերին, այդ թվում՝ Google և Facebook սոցիալական կայքերին, 6 շաբաթվա ընթացքում իրենց էջերից հեռացնել «հակակրոնական» և «հակասոցիալական» բովանդակություն ունեցող ցանկացած բան:
Շաբաթ օրը Դելիի դատարանը 22 կայքերի հրամայել է մինչ 2012 թվականի փետրվարի 6-ն իրենց էջերից հեռացնել դատապարտելի և զրպարտիչ բովանդակություն ունեցող ֆայլերը:
Քաղաքացիական դատավոր Մուկեշ Կումարն արձակել է վերոնշյալ հրամանը` բավարարելով Մուֆթի Այջազ Արշադ Քասամիի հայցը, ով ցանկանում էր սահմանափակել դատապարտելի և զրպարտիչ բովանդակությամբ ֆայլերի շրջանառությունը համացանցում:
Քասամին ներկայացրել է համացանցում տեղադրված մի քանի պատկերներ, որոնք, ըստ նրա, «կարող են վիրավորել շատերին»:
Ըստ India Today–ի՝ Քասամին հայտնել է, որ այդ պատկերները վարկաբեկում են հնդկական աստվածներին, Մուհամեդ մարգարեին և այլ կրոնական գործիչների:
