Վերջին հինգ տարիներին մարդու իրավունքների ոլորտում ետընթաց է արձանագրվել: «Առաջին լրատավական»-ի հետ զրույցում իր կարծիքը հայտնեց իրավապաշտպան Սեդա Սաֆարյանը` ամփոփելով տարին մարդու իրավունքների ոլորտում:
«Մարդիկ հավատով են դիմում դատարան: Մարդկանց մեջ դեռ հավատ կա նախաքննական մարմնի նկատմամբ, բայց աստիճանաբար ընդհանուր վստահության պակաս է առաջանում, քանի որ նախաքննական մարմնի և դատարանի հետ առնչվելիս իրավախախտումները բազմաթիվ են»,- մեկնաբանեց Ս. Սաֆարյանը` հավելելով, որ իրավապաշտպան կազմակերպությունների աշխատանքները միշտ չէ, որ արդյունավետ են լինում: Իրավապաշտպան Սեդա Սաֆարյանը նաև կարծում է, որ հասարակությունը չի կարողանում պայքարել հանուն իր իրավունքի պաշտպանության: Նրա համոզմամբ` մարդկանց հիասթափությունը մեծ է, նաև քչացել է իրավագիտակից և պայքարող խավը: Սեդա Սաֆարյանը մեծ ցավ է ապրում, որ չունի այն հարցի պատասխանը, թե այսպես դեպի ուր ենք շարժվում:
