2012 թ. հունվարից պետական կենսաթոշակների չափն ավելացել է: Ինչպես այսօր կառավարության նիստից հետո լրագրողներին պարզաբանեց ՀՀ աշխատանքի և սոցիալական հարցերի նախարար Արթուր Գրիգորյանը, հիմնական կենսաթոշակի չափը 10,500 դրամի փոխարեն կդառնա 13 հազար դրամ, ինչի արդյունքում աշխատանքային կենսաթոշակի միջին չափը 28,700-ի փոխարեն կկազմի 31,300 դրամ, սոցիալական կենսաթոշակի չափը` 13,200-ի փոխարեն` 16,500 դրամ: Շարքային կազմի զինծառայողներին տրվող հաշմանդամության միջին չափը 17,800 դրամի փոխարեն կկազմի 20,900 դրամ, աճը՝ շուրջ 24%:
Նախարարը հայտնեց, որ նպաստների բազային միջին չափը նույնպես բարձրացել է՝ 13,500 դրամից 16,000 դրամ, ինչի արդյունքում միջին ամսական նպաստը 26,850 դրամից կդառնա 29,350 դրամ:
Ա. Գրիգորյանը նշեց, որ կենսաթոշակների չափերի բարձրացմամբ պայմանավորված` ընտանեկան նպաստների համակարգում ներառված կենսաթոշակառուները չեն զրկվի նպաստից, քանի որ գործակիցը մեղմացվել է և սահմանվել է 10 հազար դրամը: Արդյունքում ավելի շատ աղքատ ընտանիքներ կընդգրկվեն նպաստների համակարգում:
«Հաջորդ տարի կենսաթոշակառուների վիճակը ինչ-որ չափով կբարելավվի, բայց կենսաթոշակների չափը դեռևս բավարար չէ` հայտարարելու համար, թե կենսաթոշակառուին վճարում ենք բավարար չափով կենսաթոշակ»,- նկատեց նախարարը:
