Ամանորյա տոներից հետո շատերիս մոտ է ցանկություն առաջանում մի քանի օրում կուտակված ավելորդ կիլոգրամից ազատվել: Ի՞նչ անել դրանից խուսափելու համար: «Առաջին լրատվական»-ի հետ զրույցում այս հարցի շուրջ իր պարզաբանումները ներկայացրեց առողջապահության նախարարության կուրորտաբանության և ֆիզիկական բժշկության գիտահետազոտական ինստիտուտի բժիշկ-դիետոլոգ Վարդանուշ Պետրոսյանը:
Ըստ նրա` սննդամթերք գնելիս ամենակարևորը պիտանելիության ժամկետներին հետևելն է: Բժիշկ-դիետոլոգը առաջին հերթին խորհուրդ է տալիս ճիշտ պահպանված սնունդ գնել թունավորումներից խուսափելու համար: Սա ամենակարևորն է:
«Տոնական օրերի 10, 12 օրում քաշի այնպիսի ավելացում, որ սպառնա առողջությանը, չի կարող լինել: Խնդիրներ առաջանում են ոչ թե այն պատճառով, որ մարդիկ խառնում են սննդամթերքները, այլ այն պատճառով, որ ուտում են հին սնունդ. Թունավորումները հիմնականում առաջանում են հին ուտելիք օգտագործելիս»,- ամփոփեց բժիշկ-դիետոլոգը:
Անդրադառնալով բարձր և ցածր կալորիականությամբ սննդամթերքներին` նա ասաց, որ գիրացնում է ոչ թե մեծ քանակով ուտելիքը, այլ շատ ուտելը, ուտելիքը չարաշահելը: Վ. Պետրոսյանը նշեց, որ մեծ քանակով ցածր կալորիականությամբ ուտելիքը նույնն է, ինչ փոքր քանակությամբ բարձր կալորիականությամբ ուտելիքը:
«Կարելի է ուտել և ուտել ամեն ինչ, սակայն պետք է այդ ուտելիքից ստացած կալորիաները ծախսել` կատարելով ֆիզիկական աշխատանք:
Մեկ շաբաթ այդպես սնվելը մեծ փոփոխություններ չի առաջացնի, բայց, երբ ալկոհոլն է չարաշահվում, դա արդեն վնասակար է»,- ամփոփեց Վ. Պետրոսյանը:
Մեր այն դիտարկմանը, թե տոնական օրերից հետո շատերը նախընտրում են բեռնաթափման օրեր անցկացնել, ասաց` դրանք վնասակար չեն: «Կարելի է նաև բեռնաթափման օրեր անցկացնել: Կարծում եմ՝ մի քանի օր բեռնաթափվելը առողջությանը չի վնասի»,- նշեց բժիշկ-դիետոլոգը:
