«Ժառանգություն»-ը և ՀՅԴ-ն, երեքշաբթի հանդես գալով համատեղ հայտարարությամբ, կոչ են արել վերացնել խորհրդարանական ընտրությունների մեծամասնական ընտրակարգը։
«Կոնգրեսը պատրաստ է այդ խնդրի շուրջ համագործակցել անխտիր բոլոր քաղաքական ուժերի հետ, ներդնելով իր ողջ ջանքերն ու կարողությունները, եւ չհավակնելով առանձնահատուկ որևէ դերի», – ասված էր նույն օրը ՀԱԿ-ի տարածած հայտարարության մեջ:
ՀԱԿ համակարգող Լևոն Զուրաբյանը «Ազատություն» ռադիոկայանի հետ զրույցում ասել է. որ ՀԱԿ-ն այդ առաջարկը, ի թիվս 7 այլ առաջարկների, արել է դեռ 2010թ. մարտին, և այդ առաջարկները` 7 առաջարկը, ուղարկվել են Եվրոպայի խորհուրդ, որ Ընտրական օրենսգրքում այդ փոփոխությունները կատարվեն։ Այդ («Ժառանգության» և Դաշնակցության) հայտարարությունը համահունչ է իրենց դիրքորոշմանը` հենց այդ պատճառով էլ իրենք ողջունել են այդ քայլը։
Թե որքանով է այսօր իրատեսական հասնել մեծամասնական ընտրակարգի վերացմանը կամ ընտրությունների թափանցիկությանը վերաբերող մյուս բոլոր առաջարկների ընդունմանը` Լ. Զուրաբյանն այդ կապակցությամբ ասել է. «Ցանկացած խնդիր հնարավոր է լուծել հասարակության և քաղաքական ուժերի ջանքերի համախմբումով, և ինչքան այդ գործընթացը խորանա, այնքան ավելի իրատեսական կդառնա Ընտրական օրենսգրքի և ընդհանրապես` Հայաստանում ընտրական գործընթացների վերափոխման ծրագիրը»։
«Այսինքն, դուք կարծո՞ւմ եք, որ առաջիկայում հնարավոր է, որ գոնե այդ համամասնական ընտրակարգը կիրառվի, ընդունվի` որպես այդպիսին», – այս հարցին ՀԱԿ համակարգողն արձագանքել է. «Ես կարծում եմ, որ եթե քաղաքական ուժերը համախմբվեն այդ հարցի շուրջ, եթե հասարակությունը համախմբվի այդ հարցի շուրջ, եթե քաղաքացիները այդ խնդիրը ընդունեն որպես լուրջ խնդիր, ևոչ միայն դա, այլ ընդհանրապես, ընտրական գործընթացը օրինական և թափանցիկ դարձնելու խնդրի շուրջ եթե հասարակությունը համախմբվի, իսկ դա այսօր ամենակարեւոր խնդիրն է Հայաստանի համար, կարելի է հասնել հաջողությունների»։
Իսկ հարցին` մինչ օրս եղե՞լ են արդյոք քննարկումներ որեւէ քաղաքական ուժի հետ` ՀԱԿ-ի առաջարկած պլատֆորմի ստեղծման շուրջ, Լ. Զուրաբյանը պատասխանել է. «Ես որևէ մեկնաբանություն չունեմ այդ կապակցությամբ։ Բնականաբար, տարբեր քաղաքական ուժերի հետ քննարկում ենք տարբեր հարցեր, բայց այս պահին որևէ բան չկա, որ հանրությանը ներկայացնելու անհրաժեշտություն լինի»։
Մոտ երկու շաբաթ առաջ ՀԱԿ-ը պատրաստակամություն էր հայտնել ազատ, արդար ընտրություններ անցկացնելու հարցում շահագրգիռ քաղաքական ուժերի հետ Ընտրական օրենսգրքում փոփոխություններ առաջարկող միասնական պլատֆորմ մշակել։