«Մարս»-ի և ԵրՄՄԳԻ տարածքներում ազատ տնտեսական գոտու ստեղծման նպատակով «Սիտրոնիքս Արմենիա» ընկերությունը նախատեսում է մինչև 2020 թ. ներդնել շուրջ 10 մլն դոլար: Ինչպես այսօր լրագրողներին հայտնեց ընկերության գլխավոր տնօրեն Արմեն Խաչատրյանը, ներդրումների մի մասն արդեն արվել է, ներկայում քննարկվում է ընկերության ներկայացրած հայտը՝ կառավարչի կարգավիճակ ստանալու համար:
Պատասխանելով «Առաջին լրատվական»-ի հարցին` Մարսում ազատ տնտեսական գոտու վերջնական ձևավորումից հետո ընդհանուր տարածքի ո՞ր մասն է զբաղեցված լինելու, Ա. Խաչատրյանը հայտնեց, որ գործարանի ընդհանուր 100 հազար քմ-ից զբաղեցված կլինի մոտ 77 հազարը, միաժամանակ կշարունակի գործել նաև գործարանը, իսկ ԵրՄՄԳԻ-ի տարածքը 27 հազար քմ է:
«Նախատեսվում է տարածքում ստեղծել ազատ տնտեսական գոտի երկու ուղղություններով` ԲՏ և նոր տեխնոլոգիաներով արտադրություն: Առաջին երկու տարում կստեղծվի մոտ 1500 աշխատատեղ, իսկ մինչև ծրագրի ավարտը` 2020թ., կստեղծվի 5 հազար աշխատատեղ: Նախնական պայմանավորվածություն կա 7-8 երկրների հետ` Իրան, ԱՄՆ, Հնդկաստան… անգլիական ընկերություն կա, բայց վերջնական պատասխանները կարգավիճակը ստանալուց հետո կլինեն»,- ասաց Ա. Խաչատրյանը:
Նա շեշտեց, որ ազատ տնտեսական գոտու արտադրանքը պարտադիր պետք է ուղղված լինի դեպի արտահանում, քանի որ առանց դրա «ազատ տնտեսական գոտի» հասկացություն չկա: Ա. Խաչատրյանի խոսքով` տարածաշրջանում նման բա չկա, Վրաստանում միայն վաճառվում է հողը, ենթակառուցվածքներ չեն ստեղծվում, և դա ներդրողի խնդիրն է: