Թող գալիք տարին բոլորի համար լինի հաջողության տարի` թե սպորտում, թե կյանքում: Այսօր լրագրողների հետ հանդիպման ժամանակ իր ամանորյա բարեմաղթանքը հղեց Հայաստանի ֆուտբոլի ազգային հավաքականի կիսապաշտպան, 2011 թ. Հայաստանի լավագույն ֆուտբոլիստ Հենրիխ Մխիթարյանը: Ամփոփելով տարին` նա մեծապես կարևորեց երկրպագուների աջակցությունը:
Հ. Մխիթարյանի կարծիքով` Իռլանդիայի խաղը չստացվեց, բայց հաջորդ տարիներին այդ բացը կլրացվի: Նա նշեց, որ ունի պայմանագիր Դոնեցկի «Շախտյոր»-ի հետ և պատրաստվում է ավարտել պայմանագիրը: «Ես կանեմ ամեն ինչ Դոնեցկի «Շախտյոր»-ին օգնելու համար: Աս տարի կարողացանք գեղեցիկ խաղ ցուցադրել, պետք է կարողանանք դա պահել և այդպես շարունակել` կատարելագործելով: Միշտ հաճելի է խաղալ ենթահարձակվողի դիրքում, ինձ համար ամենակարևորը խաղն է»,- ասաց ֆուտբոլիստը:
Ներկայացնելով հաջորդ տարվա ակնկալիքները` նա նշեց, որ մինչև ընտրական փուլը ունեն ընկերական խաղեր, որից հետո պարզ կդառնա հիմնական կազմը: Տարվա լավագույն ֆուտբոլիստ Հենրիխ Մխիթարյանը Ձմեռ պապին չի հավատում և ցանկություններ չի հայտնել: Խոսելով անձնական կյանքից` նա ասաց, որ դեռ սիրահարված չէ: Տոները ֆուտբոլիստը անցկացնելու է տանը` ընտանիքի շրջապատում:
Համատեղ ասուլիսի ընթացքում հունահռոմեական ըմբշամարտի Եվրոպայի կրկնակի չեմպիոն, Հայաստանի տարվա լավագույն մարզիկ Ռոման Ամոյանը ամանորյա բարեմաղթանք հղեց` բոլորին ցանկանալով քաջառողջություն, ամենալավն ու բարին: «Առողջական խնդիրների պատճառով այս տարի լավ հանդես չեմ եկել, բայց գալիք տարում ունենք երեք վարկանիշային մրցաշար, որոնք տասնհինգ օրը մեկ են լինելու: Մենք ունենք հնարավորություններ, մեր թիմը շատ ուժեղ է, հնարավոր է` վարկանիշներ ունենանք, ես ամեն բան կանեմ դրա համար»,- ամփոփեց Ռ. Ամոյանը:
