Աֆղանստանի արևելքում ինքնաշեն պայթուցիկ սարքի պայթյունի հետևանքով զոհվել է ՆԱՏՕ-ի երեք զինծառայող: Այս մասին հայտնում է Frnace-Presse գործակալությունը` վկայակոչելով Աֆղանստանում անվտանգության հարցերով համագործակցության միջազգային ուժերի (ISAF) ղեկավարության հայտարարությունը:
ISAF-ի վարած քաղաքականության համաձայն` զոհվածների ազգային պատկանելությունը և միջադեպի կոնկրետ տեղը չի հայտնվում` մինչև զոհվածների ընտանիքի անդամներին կատարվածի մասին տեղեկացնելը:
Աֆղանստանի տարածքում գործողություններին մասնակցում է հակաահաբեկչական կոալիցիայի՝ տարբեր ազգություններից կազմված զորախումբ, որը գլխավորում են ԱՄՆ զինված ուժերի հրամանատարության ներկայացուցիչները, և ISAF-ի զորախումբը` ՆԱՏՕ-ի ներկայացուցիչների հրամանատարությամբ:
Երկու զորախմբերի հիմնական առաջադրանքն է աֆղանական ծայրահեղական «Թալիբան» շարժման և «Ալ-Քաիդա» ահաբեկչական խմբավորման զինյալների որոնումը և ոչնչացումը:
Աֆղանսատնից օտարերկրյա զորախմբերի դուրսբերումը նախատեսված է 2014 թվականին:
