ՀՀԿ-ԲՀԿ հակամարտությունը հնարավոր է` բացահայտի փակ քաղաքական դաշտը: Այսօր լրագրողների հետ հանդիպման ժամանակ նման տեսակետ հայտնեց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը` ներկայացնելով 2011-2012 թթ. քաղաքական մարտահրավերները, զարգացումները և խնդիրները: Նա կարևորեց արտաքին և ներքին քաղաքականության ու ռազմական անվտանգության հարցերը:
Ըստ նրա` 2011 թվականին ՀՀ արտաքին քաղաքականությունը շատ ավելի ամուր դիրքերում էր: Նրա համոզմամբ` Հայաստանի իշխանությունը և արտգործնախարարությունը հասել են էական ձեռքբերումների: Դրանցից առանձնացրեց երեքը: «Առաջինը հայ-թուրքական դիվանագիտական հարաբերություններին է վերաբերում: Այս տեսանկյունից Հայաստանն ավելի ուժեղ դիրքերում է, որովհետև ԱՄՆ-ը, ԵՄ-ն և Ռուսաստանի Դաշնությունը սատարում են Հայաստանի դիրքորոշումը: Շարունակվում են ճնշումները Թուրքիայի ուղղությամբ: Հայաստանը այս հարաբերություններում ցուցաբերել է իր անկեղծությունը, մինչդեռ Թուրքիան հանդես է գալիս պակաս անկեղծությամբ»,- մեկնաբանեց Ռ. Կիրակոսյանը:
Ըստ նրա` 2011-2012թթ. հաջորդ խնդիրը ռազմական անվտանգությունն է: Ըստ նրա` Հայաստանը տարածաշրջանում պահպանում է ամենաամուր դիրքերը: Նա հաստատում է, որ Հայաստանի ռազմական առավելությունը չի վտանգում ոչ մեկին, այլ կերպ ասած` Հայաստանն է, որ աջակցում է տարածաշրջանային անվտանգությանն ու կայունությանը:
« Իտարբերությունը Ադրբեջանի և Վրաստանի`Հայաստանը կողմ է ստատուս քվոյին: Հայաստանից վտանգ չի սպառնում ոչ մեկին: Հայաստանը նաև հուսալի գործընկեր է և՛ Արևմուտքի, և՛ Ռուսաստանի համար: Այն տարածաշրջանում միակ երկիրն է, որ անդամակցում է ՀԱՊԿ-ին և իր տարածքում ունի ռուսական ռազմաբազա: Հայաստանն այլևս միջազգային անվտանգության սպառող չէ, այլ աջակից: Սա է պատճառը, որ Հայաստանի խաղաղապահները ծառայում են տարբեր երկրներում»,- իր վերլուծությունը ներկայացրեց Ռ. Կիրակոսյանը:
Նա իր մտահոգությունը հայտնեց զինված ուժերում արձանագրվող սպանությունների առնչությամբ` համարելով դրանք անընդունելի: «Այն սպաները, ովքեր համազգեստ կրելու իրավունք են ստացել, պետք է առաջնորդվեն ավելի ճիշտ չափանիշներով: Սա նաև կարգապահության խնդիր է: Բոլոր պաշտոնյաները պետք է պատասխանատվության ենթարկվեն և հաշվետու լինեն իշխանազանցության համար»,- հավելեց բանախոսը:
Խոսելով ներքին քաղաքականության մասին` Ռ. Կիրակոսյանն ասաց. այս տարին երկխոսության տարի էր: Ըստ նրա` երկխոսությունն ինքնին կարևոր է: Նրա համոզմամբ` այլ երկխոսությունների կարիք նույնպես ունենք: «Սա Դավիթների երկխոսություն չէր, այլ այն փոխեց քաղաքական մշակույթը: Իշխանության և ընդդիմության հարաբերությունները լավացան: Եթե 2011-ը երկխոսության տարի էր, հույս ունենանք, որ 2012-ը կլինի ժողովրդավարության տարի, քանի որ սպասվում են ընտրություններ»,- ամփոփեց բանախոսը: