Անցնող տարում ՀՀ տնտեսությունում օտարերկրյա ներդրումների ծավալն աճել է 24%-ով` հասնելով 547 մլն դոլարի: Այսօր տարեվերջյան ամփոփիչ ասուլիսում ՀՀ էկոնոմիկայի նախարար Տիգրան Դավթյանը կարևորեց այն, որ ներդրումները տարբերակված են ըստ ոլորտների ` հանքարդյունաբերություն, էներգետիկա, տուրիզմ, շինարարություն, ՏՏ և այլն:
Նախարարի խոսքով` ՏՏ մասով տարին հաջողված էր. բացվեցին 3 խոշոր կենտրոններ` Մայքրոսոֆթ ինովացիոն, Հայ-հնդկական և Թումո կենտրոնները: Գյումրու տեխնոպարկի շինարարական աշխատանքները կսկսվեն հաջորդ տարվա գարնանը, և տեխնոպարկը 2-3 տարի անց պատրաստ կլինի:
Տ. Դավթյանի բնորոշմամբ` լուրջ բարեփոխումներ են իրականացվել նաև գործարար միջավայրի ոլորտում. կառավարության նախորդ նիստի ժամանակ ընդունվեց հերթական համապարփակ ծրագիրը, և հաջոդ տարի կսկսվի իրականացումը:
Նախարարը նշեց` ընդունվեց օրենք ազատ տնտեսական գոտիների վերաբերյալ, կան մի շարք առաջարկներ, և առաջին ֆորմալ հայտը երեկ է ստացվել Սիտրոնիքսի ընկերությունից: Տ. Դավթյանը հայտնեց, որ բացի Մարսից և օդանավակայանից` կան առաջարկներ Ոսկերիչների համաշխարհային միության կողմից:
«Հաջորդ տարին ազատ տնտեսական գոտիների տեսակետից կլինի ակտիվ»,- եզրակացրեց նախարարը:
«Առաջին լրատվական»-ի հարցին` հայտարարվել էր, որ Մարս գործարանի տարածքում ազատ տնտեսական գոտին կսկսի գործել արդեն այս տարվա վերջին, ինչո՞ւ է ձգձգվում, Տ. Դավթյանը պատասխանեց. «Ասել էինք` կձևավորենք օրենսդրական հիմքերը: Հստակ պետքէ ֆիքսվեն խաղի կանոնները, այս տարի, ինչպես խոսք էինք տվել, տեսանելի կլինի ձևավորման գործընթացը. դա բավականին ժամանակատար խնդիր է»:
