«Գյումրու «Քութաիսյան» կոչվող խանութում սկսել էին բաժանել անապահով ընտանիքների համար նախատեսված կառավարական ձեթը, որն էլ դարձել էր կռվի ու մարդասպանության առիթ»,- գրում է «Առավոտ»-ը և հավելում.
«Այնպիսի մի հերթ էր գոյացել, որ նման բան հնարավոր չէր տեսնել նույնիսկ ցուրտ ու խավար տարիներին, այն ոչ սկիզբ ուներ, ոչ էլ վերջ և ուղեկցվում էր ամենավերջին այլանդակ հայհոյանքներով, միմյանց մազ քաշելով ու հրմշտելով: Ցավն այն է, որ հերթ կանգնողների մեջ կային նաև հենափայտով ծերեր, որոնք լրագրողներին տեսնելուն պես` խնդրում էին սոցծառայությունում ծանոթ գտնել, որպեսզի իրենց արտահերթ հատկացնեն: Օրինակ՝ ծերերից մեկը՝ Սոնիկ Գևորգյանը, արցունքներն աչքերին, մեզ առանց չափազանցության աղաչում էր իր համար բարեխոսել, քանի որ անկողնում գամված քրոջը տանը մենակ է թողել ու չի կարող անգամ «խցկվել» հերթի մեջ:
Հերթ կանգնածները պնդում էին, որ վաղ առավոտից շտապօգնության մեքենաները հերթափոխում են մեկը մյուսին, ծերերը հերթով վատանում են, ու ստիպված բժիշկ են կանչում»:
