Երկուշաբթի օրը Իսրայելի Քնեսեթի Կրթության և գիտության հանձնաժողովի նիստում քաղաքական կուսակցությունների և հայկական, թուրքական ու ադրբեջանական համայնքների ներկայացուցիչները քննարկել են Հայոց ցեղասպանության ճանաչման, ինչպես նաև ապրիլի 24-ը «հայ ժողովրդի կոտորածի» հիշատակի օր հռչակելու բանաձևերը:
Հայոց ցեղասպանությունը ճանաչելու բանաձևի հեղինակը «Մերեց» կուսակցության պատգամավոր Զահավա Գալ-Օնն է, իսկ ապրիլի 24-ը որպես հիշատակի օր նշելու բանաձևի հեղինակը` «Ազգային միասնություն» կուսակցության պատգամավոր Արիե Էլդադը:
Քնեսեթի խոսնակ Ռուվեն Ռիվլինն անձամբ ցանկություն է հայտնել մասնակցել քննարկմանը, որը հետաձգվում էր իր բացակայության պատճառով: Նախօրեին Իսրայելի կառավարության Ազգային անվտանգության խորհրդի նախագահը դիմել էր Ռիվլինին քննարկումը հետաձգելու խնդրանքով, սակայն մերժում էր ստացել:
Նիստը տևել է մոտ երեք ժամ, սակայն ոչ մի որոշում չի կայացվել: Սա նման ձևաչափով առաջին բաց հասարակական քննարկումն է եղել, որը, ըստ Հայ դատի հանձնախմբի պատասխանատու Հակոբ Սևանի, կարելի է հայերի համար «փոքրիկ հաղթանակ» համարել:
Նիստը բացել է հակահայկական ուղղվածություն ունեցող «Մեր տունը Իսրայելն է» ռուսախոս հրեաների կուսակցության անդամ, Կրթության և գիտության հանձնաժողովի նախագահ Ալեքս Միլլերը, այնուհետև ելույթներով հանդես են եկել օրինագծերի հեղինակները` Զահավա Գալ-օնը և Արիե Էլդադը: Նրանք խոսել են Ֆրանսիայում տեղի ունեցած վերջին զարգացումների մասին և Հայոց ցեղասպանության հարցը վերջնականապես փակելու և ճանաչելու մասին:
Քնեսեթի խոսնակ Ռիվլինն իր խոսքում նշել է, որ բանաձևի ճանաչումը պատմական և բարոյական հարց է, և խնդիրը լուծում է պահանջում: Խորհրդարանական կոալիցիայի նախագահ, հայ ժողովրդի բարեկամ Զեև Էլքինը, որն ամեն հնարավոր միջոցներով արդեն հինգ տարի շարունակ աջակցում է հայկական համայնքին, նշել է, որ Իսրայելը բարոյական իրավունք չունի լինել վերջին պետությունը քաղաքակիրթ աշխարհում, որը կընդունի Հայոց ցեղասպանությունը, և որ այսօրվա նիստն առանց չափազանցնելու «կարելի է պատմական համարել»:
Հայ դատի տեղի պատասխանատու Ժորժետ Ավագյանն իր ելույթում ասել է. «Մենք` հայերս, Իսրայելի քաղաքացի մեր սերունդներին իրավունք չունենք ժխտողականություն սերմանել ու սովորեցնել»:
Թուրքական համայնքի ներկայացուցիչն իր ելույթում նույնիսկ սպառնացել է պառլամենտականներին` ասելով, որ այս քննարկումները վատ ազդեցություն կունենան թուրք-իսրայելական առանց այն էլ բարդ հարաբերությունների վրա:
Մի քանի ժամ տևած քննարկումների արդյունքում որոշում է կայացվել շարունակել հասարակական բաց քննարկումները: Իսրայելի խորհրդարանականները խնդրել են հայերին հանձնաժողովին ներկայացնել բոլոր պետությունների ու առանձին խորհրդարանների` Հայոց ցեղասպանության հետ կապված բանաձևերն ու որոշումները` քննարկումները շարունակելու համար:
