Թուրքական Cumhuriyet թերթի փոխանցմամբ, Թուրքիայի իշխող «Արդարություն և զարգացում» կուսակցությունը (ԱԶԿ) ներկայացնող Կարսի քաղաքապետ Նևզաթ Բոզքուշը հայտարարել է, որ ի պատասխան Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունման՝ Կարսում կարող է կառուցվել Ալժիրում «իրականացված գազանություններին» նվիրված հուշարձան։
Բոզքուշը հավելել է. «Դա Ֆրանսիայի «գործը չէ», մեր և հայերի գործն է (իսկ ի՞նչ գործ ունի Թուրքիան ղարաբաղյան հակամարտության կարգավորման հարցում.- 1in.am)։ Հնարավոր է՝ ապագայում մենք հայերի հետ ավելի լավ հարաբերություններ ունենանք։ Եթե Ֆրանսիայում գործընթացը զարգացում ստանա, ապա մենք Կարսում կառուցելու ենք «ալժիրյան զուլումին» նվիրված հուշարձան»։
Հիշեցնենք, որ Նևզաթ Բոզքուշի ղեկավարման ժամանակ Կարսում ապամոնտաժվեց նախորդ քաղաքապետ Նաիֆ Ալիբեյօղլուի (ով ներկայացնում է հիմնական ընդդիմադիր «Ժողովրդա-հանրապետական» կուսակցությունը, ԺՀԿ) ղեկավարման ժամանակ կառուցված և հայ-թուրքական բարեկամությանը նվիրված մոտ 30 մետրանոց «Մարդկության» հուշարձանը։
