Volkswagen ավտոկոնցեռնը անջատելու է Blackberry ծառայողական սմարթֆոններին ուղարկվող էլեկտրոնային նամակների գործառույթը աշխատանքային օրվա ավարտից 30 րոպե հետո:
Ինչպես հաղորդում է The Financial Times Deutschland-ը, այդ կերպ VW-ի աշխատակիցների արհմիությունը հասել է նրան, որ ղեկավարությունը չի կարողացել աշխատակիցներին ստիպել հավելյալ աշխատել հանգստյան օրերին կամ աշխատանքային ժամանակի ավարտից հետո:
Ներքին համաձայնությունը տարածվում է 1.1 հազար աշխատակիցների վրա: Ըստ այդ պայմանի` VW-ը էլեկտրոնային նամակներ ուղարկելու գործառույթն անջատելու է աշխատանքի ավարտից 30 րոպե անց և միացնելու է հաջորդ աշխատանքային օրը սկսվելուց կես ժամ առաջ: Այդուհանդերձ, հնարավոր կլինի հեռախոսից զանգահարել և զանգեր ընդունել:
Ընկերության ներկայացուցիչ Հեյնց Յոհասիմ Թուստի խոսքերով, այս օրենքը վերաբերելու է նաև գլխավոր մենեջերներին, ինչպես նաև այն աշխատակիցներին, որոնց հետ աշխատանքային պայմանագիր կնքված չէ:
