Ֆրանսիան ցույց տվեց իր ժողովրդավար պետություն լինելը: «Առաջին լրատվական»-ի հետ զրույցում նման տեսակետ հայտնեց ԱԺ «Ժառանգություն» խմբակցության պատգամավոր Զարուհի Փոստանջյանը` անդրադառնալով Ֆրանսիայում ընդունված Հայոց ցեղասպանության հերքումը քրեականացնող օրինագծին:
Ըստ Զ. Փոստանջյանի` Ֆրանսիան, լինելով ժողովրդավար պետություն, հաստատակամ գնում է այդ ճանապարհով, ինչի հավաստումն է նաև նման օրինագծի ընդունումը: «Բոլորիս շահն է հարգել մարդու իրավունքները, պաշտպանել և վերականգնել մարդու իրավունքները: Հիմա կարող ենք ասել, որ իրապես նման օրինագիծ ընդունելով Ֆրանսիան սպասարկում է այդ շահը»,- մեկնաբանեց պատգամավորը:
Զ. Փոստանջյանը նաև նշեց, որ ապագա զարգացումները կպայմանավորվեն նաև Հայաստանի արտաքին դիվանագիտության աշխատանքով: «Օսմանյան կայսրությունից ժառանգած Թուրքիայի այդ վարքագիծը պետք է մշտապես ենթարկվի քննադատության, դա կարող է լինել բողոքի գործողությունների տեսքով, համապատասխան դիվանագիտական խողովակների, պահանջատիրության միջոցով»,- ամփոփեց Զարուհի Փոստանջյանը: