Արգենտինայի Սենատում օրենք է ընդունվել, ըստ որի՝ տպագիր թերթերը և ամսագրերն անցնում են երկրի կառավարության հսկողության տակ: Ինչպես հաղորդում է BBC-ն, փաստաթղթի համաձայն՝ տպագիր պարբերականների տպագրումը, վաճառքը և տարածումը վերաբերում են համազգային շահերին:
Վերլուծաբանները նոր օրենքը համարում են երկրի նախագահ Քրիստինա Ֆերնանդեսի հաղթանակը, որը երկար ժամանակ հարձակումների էր ենթարկվում երկրի խոշորագույն մեդիա-կորպորացիաներից մեկի՝ Clarin-ի կողմից:
Քննադատները, սակայն, կարծում են, որ դրանով սահմանափակվում է երկրում խոսքի ազատությունը: Մինչդեռ օրենքի կողմնակիցները նշում են, որ այն ապահովում է նորմալ գնով թերթի թղթի հասանելիությունը բոլոր հրատարակիչների համար։
Սակայն Clarin և La Nacion ընկերությունները, որոնց 1970-ականներից պատկանում է երկրում թղթի արտադրությունը, ասում են, որ պետությունը դրանով իրենց ձեռքից խլում է մասնավոր սեփականությունը:
Վերլուծաբանները նշում են, որ թերթի թղթի արտադրությունը նախագահի և ընդդիմադիր մամուլի միջև առանցքային խնդիրներից մեկն էր:
