Այսօր ՀՀ ԿԳ նախարար Արմեն Աշոտյանը ամփոփելով 2011 թվականը` այն գնահատեց որպես հին խնդիրների և լուրջ ձեռքբերումների տարի: ԿԳ նախարարի կարծիքով` կրթության բովանդակության առումով գրանցվել են լուրջ հաջողություններ, սակայն հիմնարար մի շարք խնդիրներ դեռևս լուծման կարիք ունեն:
125 համայնքներում ստեղծվել են նախակրթարաններ, շուրջ 1700 երեխա այս տարվա սեպտեմբերի 1-ից հաճախել է նախակրթարաններ և ստացել նախադպրոցական կրթություն: Բացի այդ, հաստատվել է նախադպրոցական կրթության նոր պետական չափորոշիչը. «Մենք ունենք նախադպրոցական կրթության համար լավագույն միջազգային փորձի ուսումնասիրություն, նոր հայեցակարգ և նոր բովանդակություն»,- նկատեց նախարարը:
Նախարարի խոսքերով` տարին բուռն էր դպրոցի տնօրենների քննությունների առումով: Ըստ նրա` ամենահաջողված բարեփոխումներից մեկը 2011-ին հավաստագիր ստանալու գործընթացն էր: Տարվա ընթացքում 8000 ուսուցիչ մասնակցել է վերապատրաստման դասընթացների, նրանց սպասվում է ատեստավորման և հավաստագրի շնորհման գործընթացը, որը նոր տարվա սկզբին անմիջապես կիրականացվի:
Նա նաև նշեց, որ ակտիվորեն ընթանում է դպրոցաշինությունը. այս տարվա դպրոցաշինության ծրագրում ներգրավված են ինը ավագ դպրոց, և դրանց վերակառուցման նպատակով հատկացվել է 1 մլրդ 200 մլն դրամ` ինչպես մայրաքաղաքում, այնպես էլ մարզերում:
«Այս տարին պատմական էր այն առումով, որ մենք վերջապես անցանք 12-ամյա կրթության, 2006-ին կայացած որոշումը 2011-ին միս ու արյուն ստացավ», -ավելացրեց նախարարը:
Նախարարը հայտնեց նաև, որ այս տարի Հայաստանում բացվեց առաջին միջազգային դպրոցը. Քվանտ վարժարանը ստացել է միջազգային բակալավրիատի միության սերտիֆիկատ և համարվում է Հարավային Կովկասում հինգերորդ, իսկ Հայաստանում` առաջին միջազգային դպրոցը, որն իրավունք ունի դասավանդել «Այբ»-ի համակարգի ծրագրերով:
ՀՀ աշակերտները 6 միջազգային առարկայական օլիմպիադաներում ընդհանուր առմամբ 10 մեդալ և դիպլոմներ ստացան: Նախարարի խոսքերով` նախորդ տարիների համեմատ այս թիվն աճել է երեքով: Այս տարի դպրոցներում նաև համակարգչայնացման բուռն տարի էր. 2500 համակարգիչներ բաշխվեցին 250 հայաստանյան դպրոցների և 10 ԼՂՀ դպրոցների:
Այս տարի առաջին անգամ ողջ աշխարհով Հայաստանը շախմատը դարձրեց դպրոցական ծրագրի բաղկացուցիչ մաս, և սա բուռն հետաքրքրություն առաջացրեց միջազգային մամուլի և միջազգային մասնագիտական շրջանակների մոտ, ինչը նախարարը հաջողված է համարում` հույս հայտնելով, որ այն հայկական կրթական համակարգի բրենդն է:
Բացի այդ, Հայաստանում ընդլայնվել է ներառական կրթությունը` Հայաստանում 81 դպրոց իրավունք ունի իրականացնել ներառական կրթություն: Հատուկ դպրոցներում կիրառվել է հսկողության խստացված մեխանիզմ: Այս տարի իրականացվել է կրթության ոլորտի հակակոռուպցիոն գործողությունների ծրագիրը:
Նվազել է մասնավոր բուհերի թիվը, իսկ մնացած մասնավոր բուհերի զգալի մասը խոշորացման գործընթացում է: Փորձում են միասնական ջանքեր կիրառել շուկայում առավել մրցունակ լինելու համար:
Ըստ Արմեն Աշոտյանի` 2011-ին չի հաջողվել ամբողջությամբ լուծել կրթության որակի բարձրացման համակարգային խնդիրը թե՛ հանրակրթության, թե՛ բարձրագույն կրթության ոլորտում, դեռևս վերջնականապես լուծված չեն կոռուպցիոն ռիսկերի նվազեցման նպատակները: Թեև հաջողություններ կան, բայց, ըստ նախարարի, այդ տեմպը չի բավարարում ոչ իրենց, ոչ էլ հասարակությանը: Ուսումնական հաստատությունները ունեն նաև գույքային, կրթության մատչելիության խնդիրներ:
Անդրադառնալով նախորդ տարի իր դեմ ուղղված` մենք դեմ ենք օտարալեզու դպրոցների վերաբացմանը նախաձեռնությանը, նախարարը նշեց, որ բոլորը տեսան` այդ մտահոգությությունների մի մասը պատվիրված էր` ավելացնելով, որ օտարալեզու դպրոցների վերաբացման մասին երբեք խոսք չի գնացել. «Մենք միջազգային կրթական ծրագիր իրականացրինք, «Այբ»-ի դասարան բացվեց, որի դեմ զարմանալիորեն ոչ մի հրապարակային քննադատություն ինձ հասանելի չեղավ»: