Իսրայելական The Jerusalem Post-ի փոխանցմամբ՝ Իսրայելը հրաժարվել է Թուրքիային վաճառել հետախուզական համակարգեր։ Իսրայելի կառավարությունը արգելափակել է ռազմաօդային ուժերի համար նախատեսված հետախուզական համակարգերի հատկացման վերաբերյալ գործարքը։
2009 թվականին Թուրքիայի հետ կնքված համապատասխան համաձայնագիրը գնահատվում է մոտ 140 միլիոն դոլար, համաձայնագրի իրագործմամբ զբաղվում էին IAI և Elbit ընկերությունները։ Վերջիններս պետք է այդ հետախուզական համակարգերը մատակարարեին առաջիկա ամիսներին։ Elbit ընկերության տվյալներով՝ տվյալ համաձայնագիրը չեղարկվել է քաղաքական դրդապատճառներով։
Ըստ այդ համաձայնագրի՝ թուրքական ռազմաօդային ուժերը պետք է իրենց կործանիչների համար Իսրայելից ստանային հետախուզական կոնտեյներներ՝ Lorop տիպի ինֆրակարմիր տեսախցիկներ և այլ հավելյալ սարքավորում։
Հիշեցնենք, որ ներկայումս Թուրքիայի և Իսրայելի ռազմաօդային ուժերը պայմանավորվել են կոորդինացման մեխանիզմի վերականգնման շուրջ, որի նպատակը Միջերկրական ծովում միջադեպերի ու բախումների կանխումն է։
Ավելին՝ Իսրայելը պլանավորել է Թուրքիայի ռազմաօդային ուժերին հրավիրել 2013 թվականին կայանալիք խոշոր ռազմաօդային զորավարժություններին։
