Դեկտեմբերի 22-ին Հայ-ռուսական սլավոնական համալսարանում տեղի է ունեցել «Հովհաննես Իմաստասեր Կաթողիկոս Օձնեցի» բարեգործական հիմնադրամի շնորհանդեսը: Ինչպես տեղեկացրել է ՀՌՀ մամուլի քարտուղար Գոհար Ղումաշյանը, հիմնադրամը ստեղծվել է հայրենի պատմության և ճարտարապետության գոնե որոշ բացառիկ հուշարձանները կյանքի կոչելու համար: Հիմնադրամի նպատակն է Հայաստանի տարածքում գտնվող պատմաճարտարապետական գլուխգործոցների վերականգնումը ՀՀ մշակույթի նախարարության նախագծերով և վերահսկմամբ, Հայ Առաքելական եկեղեցու հովանու ներքո:
Հիմնադրամն անվանակոչված է վաղ միջնադարի կաթողիկոսներից մեկի` Հովհաննես Իմաստասեր Օձնեցու անունով (VII դար): Հիմնադրամի ստեղծման նախաձեռնողը Ռուսաստանում բնակվող, ծագումով օձնեցի գործարար Մովսես Վարազդատի Ձավարյանն է։
Իր բարեգործական աշխատանքի ընթացքում հիմնադրամը մտադիր է իրականացնել մի շարք ծրագրեր: Այսօրվա դրությամբ դրանցից հիմնականը Լոռու մարզի Օձուն գյուղում Սբ. Մարիամ Աստվածածին եկեղեցու վերածնունդն է:
ՀՌՀ ռեկտոր և հիմնադրամի հոգաբարձուների խորհրդի անդամ Արմեն Դարբինյանը նշել է, որ այս կազմակերպությունը մի քանի կարևորագույն խորհուրդ ունի իր մեջ: «Առաջինը` նվիրումի խորհուրդն է: Ես չեմ սիրում «բարերար», «նվիրատվություն» հասկացողությունները: Եթե կարող ես նվիրվել, փորձիր չնվիրել: Սա ամբողջապես նվիրելու և նվիրվելու հղում է։ Երկրորդը` պատասխանատվության խորհուրդն է` հայրենիքի, ազգի, հողի նկատմամբ: Իսկ երրորդը, կարծում եմ, սերունդների միջև կապի հարցն է: Մենք մի ազգ ենք, որն ունի հնադարյան պատմություն, և մենք հպարտանում ենք նրա բոլոր էջերով: Բայց մենք շատ հաճախ ականատես ենք լինում նրան, որ հին պատմությունը դառնում է ծեր, և հին ազգը կարող է վերածվել ծեր ազգի: Պատմությունը պետք է հիմք հանդիսանա առաջընթացի, պրոգրեսի համար»,– ասել է Դարբինյանը:
«Ուրախ եմ, որ մեր հասարակության մեջ կան մարդիկ, որոնց հուզում է ազգային մշակույթի վերածնունդը։ Ուզում եմ հավատալ, որ Օձունի վերականգնումին կհաջորդեն այլ բարեգործական ծրագրեր»,– նշել է ՀՀ Ազգային ժողովի պատգամավոր Լիլիթ Գալստյանը: