Եգիպտոսն այսօր հայտնել է, որ չի ընդունում որևէ միջամտություն իր ներքին գործերին: Հայտարարությունն արվել է այն բանից հետո, երբ երկուշաբթի օրն ԱՄՆ պետքարտուղար Հիլարի Քլինթոնը քննադատել էր երկրի ղեկավարությանը՝ եգիպտացի կին ցուցարարների նկատմամբ բռնություն գործադրելու համար:
Ինչպես արդեն հաղորդել էինք, երկուշաբթի օրը Քլինթոնը քննդատել էր Եգիպտոսի անվտանգության ուժերի գործողություններն` ասելով, որ երկրում կանանց նկատմամբ «համակարգված բռնություններ» են տեղի ունենում, որոնք «պատվազրկում են պետությունը»: Ըստ Associated Press-ի՝ սա առաջին անգամն էր, որ ամերիկացի պաշտոնյան նման կերպ էր արտահայտվում Եգիպտոսի նոր ղեկավարության մասին:
Եգիպտոսի պետական լրատվական գործակալությունը հայտնել է, որ երկրի արտաքին գործերի նախարար Քամել Ամրասն ասել է. «Եգիպտոսը չի ընդունում որևէ միջամտություն իր ներքին գործերին»:
