Այսօր Հայաստանում Ֆրանսիայի դեսպանատանը տեղի ունեցավ ԵԱՀԿ Մինսկի խմբում ֆրանսիացի համանախագահ Բեռնար Ֆասիեի ասուլիսը, որը յոթ տարի անց ավարտում է համանախագահի իր առաքելությունը:
Բաքվից Երևան ժամանած Բ. Ֆասիեն հայտարարեց, որ եկել է հրաժեշտ տալու բազմաթիվ ընկերներին: Այսօր առավոտյան նա այցելել է Ծիծեռնակաբերդ, ծաղկեպսակ է դրել և խոնարհվել անմար կրակի առջև, ինչպես նաև այցելել է Մատենադարան, ապա հրաժեշտ է տվել Սերժ Սարգսյանին, Էջմիածին է այցելել և հրաժեշտ տվել Վեհափառին:
Բ. Ֆասիեն նշեց, որ միջնորդի գործունեությունը չի կարելի հեշտ և դյուրին գործ համարել, քանի որ չորս կողմից եղել են բարդություններ: Երկու ռուս, երեք ամերիկացիների հետ աշխատած ֆրանսիացի համանախագահը նշեց, որ փորձել են խաղաղ, փոխզիջումային տարբերակ գտնել ղարաբաղյան հակամարտության կարգավորման համար: «Չնայած նրան, որ չենք կարողացել հասնել նրան, ինչին ձգտում էինք, բայց արդեն իսկ մի շարք կարևոր ձեռքբերումներ ունենք:
Հիշո՞ւմ եք, դեռ յոթ տարի առաջ լրագրողներն ասում էին, թե համանախագահները ոչինչ չեն առաջարկել: Այժմ միասնություն կա համանախագահների միջև: Դեկտեմբերին համանախագահող երկրների ներկայացուցիչները փաստաթուղթ առաջարկեցին: Առաջին անգամ համանախագահող երկրների ղեկավարները միասնական հանդես եկան Ակվիլայում, նրանք միասնական ներկայացրին վեց սկզբունքները, Մոսկակայում կրկնեցին նույն կոնցեպցիան: Այս տարի Դովիլում երեք նախագահները դարձյալ հրապարակեցին ուժեղ և բովանդակային հայտարարություն, որպեսզի առաջընթաց ապահովեն Կազանի հանդիպմանը հուլիսին: Սակայն, ցավոք, դա տեղի չունեցավ: Բայց Մադրիդյան սկզբունքները դեռ բանակցությունների սեղանին են շարունակում մնալ:
Չի կարելի ասել, որ ԵԱՀԿ ՄԽ-ն ոչինչ չի առաջարկում, այլ կարելի է ասել, որ համանախագահող երկրները միասնական դիրքերից են հանդես գալիս: ՄԽ-ն կարող է օգնել կողմերին մոտեցնել դիրքորոշումները, բայց չի կարող կողմերի փոխարեն որոշումներ կայացնել: Այժմ հարմար պահ է բարենպաստ մթնոլորտ ստեղծել, և դա ոչ միայն նախագահների միջև: Բոլորը պետք է հասարակություններին նախապատրաստեն խաղաղության, այլ ոչ թե պատերազմի»:
Իր առաքելությունն ավարտող համանախագահը այսօր կարևորեց. «Նոր պատերազմ չբռնկվեց ԵԱՀԿ Մինսկի խմբի ջանքերով, այս հակամարտությունը չի կարող ռազմական լուծում ունենալ նույնիսկ Ադրբեջանի համար, քանի որ դա նոր արյունահեղություն է, նոր փախստականներ են…»,- հայտարարեց Բ. Ֆասիեն:
