Այսօր Վերաքննիչ դատարանում մերժվեց ոստիկանության կողմից վնասազերծված բանդայի անդամ Անդրանիկ Հակոբյանի կալանքը գրավով փոխարինելու բողոքարկումը: Այս մասին «Առաջին լրատվական»-ին հայտնեց Ա. Հակոբյանի փաստաբան Աստղիկ Ղազարյանը:
Արարատի և Վայոց ձորի մարզերի ընդհանուր իրավասության դատարանին Աստղիկ Ղազարյանը դիմել էր Անդրանիկ Հակոբյանի կալանքը գրավով փոխարինելու միջնորդությամբ: «Իմ կողմից ներկայացված միջնորդությունը մերժվել է 02.12.2011թ.-ին: Սրանից հետո որոշեցինք բողոքարկել որոշումը Վերաքննիչ քրեական դատարանում»,- մանրամասնեց փաստաբանը`հավելելով, որ այն մերժվեց այսօր:
Փաստաբանը կարծում է, որ եթե նույնիսկ խափանման միջոց էր ընտրվել կալանքը, հնարավոր էր այն գրավով փոխարինելու որոշում կայացնել: Ըստ Ա. Ղազարյանի`այն հոդվածներով, որոնցով մեղադրվում է Անդրանիկ Հակոբյանը, թույլատրվում է գրավի կիրառումը: «Նշեմ, որ Եվրոպական դատարանը որոշումներ ունի նաև այն գործերով, որոնցով ներպետական օրենքն արգելում է գրավի կիրառում, դա համարվում է մարդու իրավունքների խախտում»,- մեկնաբանեց փաստաբան Աստղիկ Ղազարյանը:
Անդրանիկ Հակոբյանը մեղադրվում է քրեական օրենսգրքի երկու հոդվածով` 268 հոդվածի 2-րդ մասի 2-րդ կետով՝ թմրանյութ պահել և 235 հոդվածի 4-րդ մասով՝ գազային ատրճանակ պահել:
Հիշեցնենք, որ Անդրանիկ Հակոբյանը սեպտեմբերի 23-ին ՀՀ ոստիկանության կողմից վնասազերծված բանդայի անդամներից մեկն է: Նրա հետ կալանավորվել են նաև եղբայրը և եղբոր կինը:
