Վերջին շրջանում հայկական լրատվամիջոցները անդրադարձան այն խնդրին, թե Ռուսաստանում գործող «Միաբանություն» կենտրոնի ղեկավար Սմբատ Կարախանյանը, որը ազդեցիկ կապեր ունի ռուսաստանյան իշխանությունների հետ, այժմ ակտիվ շփումներ է սկսել հայաստանյան իշխանությունների հետ:
Դրանից հետո Կարախանյանը հարցազրույց տվեց «Ժողովուրդ» օրաթերթին և ներկայացրեց իր վերլուծությունները հայաստանյան ներքաղաքական իրավիճակի վերաբերյալ:
Պատասխանելով հարցին՝ արդյոք Պուտինը լոյա՞լ է վերաբերվում Հայ ազգային կոնգրեսին, Կարախանյանը ասել է. «Ես չգիտեմ, թե Կոնգրեսի քաղաքական մարմինն ընտրություններից առաջ ինչ որոշումներ կընդունի, բայց այսօրվա դրությամբ կարող եմ ասել՝ մասամբ մասնակից լինելով բոլոր այդ հանդիպումներին և բանակցային պրոցեսներին, որ Կոնգրեսից հստակ մի բան Է ակնկալվում, որ տարվի հայամետ քաղաքականություն: Հարցը դրված չէ՝ ռուսամետ, այլ հայամետ: Հարցը դրվում է այսպես՝ մենք ինչ տեսակ Հայաստան ենք ուզում, որ արևմտյան կցորդ դառնա ու տարբեր ասոցացված միությունների միջոցով մտնի Թուրքիայի տա՞կ, արևմտյան ստրատեգները Հայաստանում ստեղծեն տրանզիտային արտաքին ռազմական հարթակնե՞ր: Հետո էլ վերջին պահին գան ռուսների գիրկն ու ասեն. «Մենք ձերն ենք՝ ոտքով գլխով, հոգով սրտով»:
Հայ ազգային կոնգրեսի համակարգող Լևոն Զուրաբյանին այսօր կայացած ասուլիսի ժամանակ «Առաջին լրատվական»-ը հարց ուղղեց. «Պարոն Զուրաբյան, ի՞նչ կապ ունի Կարախանյանը Կոնգրեսի հետ, և ի՞նչ առաքելություն է նա իրականացնում Մոսկվայում Կոնգրեսի համար»:
Ի պատասխան մեր հարցին Զուրաբյանը նշեց, որ նախ՝ ոչ ոք չի կարող Կոնգրեսի առջև դնել հայամետ ուժ լինելու խնդիր, որովհետև ՀԱԿ-ը, առանց որևէ մեկի ցուցումի կամ ճնշման, հայաստանակենտրոն և հայամետ ուժ է. «Սմբատ Կարախանյանը «Միաբանություն» կենտրոնի ղեկավարն է, որն ունի բավական լուրջ կապեր, համակրում է Շարժման նպատակներին և իր հնարավորությունների չափով օգնում է՝ և՛ հանդիպումների կազմակերպման, և՛ այլ հարցերի ոլորտներում, ընդամենը սա է: Բայց Ռուսաստանի իշխանությունների հետ մեր կոնտակտները նույնքան ինտենսիվ են, որքան մեր կոնտակտները Միացյալ Նահանգների, Եվրոպայի Միության երկրների։ Մենք կարծում ենք, որ պետք է մշտական կապերի մեջ լինենք Հայաստանում բոլոր ազդեցիկ խաղացողների հետ։ Հատկապես կարևոր ենք համարում կապերը Ռուսաստանի հետ, որը Հայաստանի ռազմավարական դաշնակիցն է»:
Փորձեցինք ճշտել՝ արդյոք ՀԱԿ նոյեմբերի 25-ի հանրահավաքից առաջ, երբ ՀԱԿ առաջնորդ Լևոն Տեր-Պետրոսյանը քաղաքագիտական վերլուծության կոնտեքստում համագործակցության առաջարկ արեց ԲՀԿ-ին, Լևոն Զուրաբյանը հանդիպե՞լ է Սմբատ Կարախանյանի հետ։ Սրան ի պատասխան՝ Զուրաբյանն ասաց. «Ես Սմբատ Կարախանյանի հետ այս տարի հանդիպել եմ երկու անգամ, բայց հիմա չեմ կարող հիշել՝ դա հանրահավաքից առա՞ջ էր, թե՞ հետո: Փորձենք հիշել, թե երբ էի ես գնացել Մոսկվա… Հիմա դժվարանում եմ հիշել»:
