Լիբիայի իշխանությունները 2011 թ. նոյեմբերին ձերբակալված՝ Մուամար Քադաֆիի որդի Սեյֆ Ալ-Իսլամին պետք է անհապաղ փաստաբան տրամադրեն, որը կներկայացնի նրա շահերը իր դեմ հարուցված դատական գործընթացի ժամանակ: Այսպիսի կարծիք են հայտնլ Human Rights Watch (HRW) միջազգային իրավապաշտպան կազմակերպության մասնագետները ձերբակալված Սեյֆ Ալ-Իսլամին այցելությունից հետո:
«Սեյֆ Ալ-Իսլամի խոսքերով՝ իրեն լավ բժշկական օգնություն են ցուցաբերում և լավ կերակրում են: Նա բողոքներ չունի բանտի պայմաններից: Գլխավորապես նրան անհանգստացնում է հարազատների և փաստաբանի հետ կապի բացակայությունը»,- նշել է կազմակերպության հատուկ խորհրդական Ֆրեդ Աբրահամսը, որի խոսքերը մեջբերվում են կազմակերպության էջում:
Լիբիայի գլխավոր դատախազ Աբդել Ազիզ Ալ-Հասադին հայտնել է, որ իշխանությունները կթույլատրեն մեղադրյալին օգտվել փաստաբանի ծառայություններից, հենց որ նրան տեղափոխեն Տրիպոլի՝ նոր բանտ (այս պահին նա պահվում է Զոնտանում):
Հիշեցնենք, որ ավելի վաղ Հաագայի Միջազգային քրեական դատարանը հայտնել էր, թե Սեյֆ Ալ-Իսլամի դեմ դատական գործընթացը կարող է քննվել Լիբիայում:
