Դեկտեմբերի 17-ին ՅՈՒՆԵՍԿՕ-ի ասոցացված 10 դպրոցների շուրջ 60 աշակերտ է մասնակցել ՅՈՒՆԵՍԿՕ-ի գործերով Հայաստանի ազգային հանձնաժողովի և ՄԱԿ-ի հայկական ասոցիացիայի համատեղ ջանքերով Հայաստանում առաջին անգամ իրագործված «Մոդել ՅՈՒՆԵՍԿՕ» խորհրդաժողովին, որը կրում էր «Երեխաները հանուն միջմշակութային երկխոսության» խորագիրը:
Խորհրդաժողովը կայացել է Երևանի պետական համալսարանի Պալյանների դահլիճում: Այն ներկայացնում էր ՄԱԿ-ի տնտեսական և սոցիալական խորհրդի խորհրդաժողովի նմանակումը, որի ընթացքում մասնակիցները հանդես են եկել ՄԱԿ-ի անդամ պետությունների դեսպանների դերում և քննարկել կազմակերպության, ինչպես նաև ՅՈՒՆԵՍԿՕ-ի օրակարգի երկու կարևորագույն թեմաները` «Կրթություն հանուն կայուն զարգացման. հանդուրժողականության ուսուցում», «Մարդու իրավունքներ. երեխաների թրաֆիքինգ»:
Խորհրդաժողովին ներկա են եղել ՀՀ կրթության և գիտության, Երևանի քաղաքապետարանի ներկայացուցիչները, ՅՈՒՆԵՍԿՕ-ի ասոցացված դպրոցների տնօրենները և համակարգող ուսուցիչները:
Գլխավոր խորհրդաժողովի բացման արարողությանը ելույթով հանդես են եկել ՅՈՒՆԵՍԿՕ-ի գործերով Հայաստանի ազգային հանձնաժողովի գլխավոր քարտուղար Վահրամ Կաժոյանը և ՄԱԿ-ի հայկական ասոցիացիայի նախագահ Արմինե Պոդոսյանը:
Խորհրդաժողովի նախագահի ողջույնի խոսքից հետո սկսվել է Տնտեսական և սոցիալական խորհրդի լիագումար նիստի նմանակումը, որի ընթացքում անդամ երկրների «դեսպանները» հանդես եկան պաշտոնական հայտարարություններով:
Լիագումար նիստին հետևել են քննարկումները համապատասխան կոմիտեներում: Դրանք ի հայտ են բերել խորհրդաժողովի մասնակիցների հարուստ գիտելիքները ոչ միայն ՅՈՒՆԵՍԿՕ-ի, ՄԱԿ-ի, Տնտեսական և սոցիալական խորհրդի և դրա ընթացակարգերի, այլև ՄԱԿ-ի անդամ երկրների պատմության, մշակույթի, աշխարհագրության, արտաքին քաղաքականության վերաբերյալ:
Խորհրդաժողովի ավարտին ընթերցվել են երկու կոմիտեներում ընդունված հայտարարությունները, որից հետո ամփոփիչ ելույթով հանդես եկել ՅՈՒՆԵՍԿՕ-ի գործերով Հայաստանի ազգային հանձնաժողովի անդամ, ՅՈՒՆԵՍԿՕ-ի ասոցացված դպրոցների ազգային համակարգող Ստելլա Մելքոնյանը և ՄԱԿ-ի հայկական ասոցիացիայի գործադիր տնօրեն Արփինե Դանիելյանը:
Միջոցառման վերջում տեղի է ունեցել մրցանակների շնորհման արարողություն: