Newsru.com-ի փոխանցմամբ՝ Պոլսի Հայոց պատրիարքարանում տեղի են ունեցել Թուրքիայի նոր Սահմանադրության վերաբերյալ քննարկումներ։ Դրանց մասնակցել են Թուրքիայի ոչ մուսուլման բոլոր կրոնական փոքրամասնությունների ղեկավարներն ու ներկայացուցիչները, այդ թվում՝ նաև Պոլսի Հայոց պատրիարքի փոխանորդ, արքեպիսկոպոս Արամ Աթեշյանը և Պոլսի Հունաց պատրիարք Բարդուղիմեոսը։
Նշվում է, որ այս հանդիպման նախաձեռնողները թուրքական իշխանություններն են, որոնք դրանով ձգտում են ստանալ նոր Սահմանադրության վերաբերյալ ոչ մուսուլմանների առաջարկները։ Կրոնական փոքրամասնությունների ներկայացուցիչներին հետաքրքրել է խղճի ու դավանանքի ազատության վերաբերյալ պետական երաշխիքների հարցը։
Հանդիպման արդյունքներով որոշվել է ձևավորել աշխատանքային խումբ, որը կդիտարկի կրոնական փոքրամասնությունների ներկայացուցիչների բոլոր առաջարկները և կպատրաստի համապատասխան զեկույց, որն էլ կներկայացվի Թուրքիայի խորհրդարանին։
Հիշեցնենք, որ այս տարվա սեպտեմբերի վերջին Թուրքիայի վարչապետ Էրդողանը հույս էր հայտնել, որ նոր Սահմանադրության մշակման գործընթացը կավարտվի 2012 թվականի առաջին կեսին. «Այդ նպատակով ստեղծվելու է հատուկ կայք՝ www.yenianayasa.gov.tr (նոր Սահմանադրություն) և ուսումնասիրվելու է 60 երկրների Սահմանադրություն։
Դա վերաբերում է բոլոր մայրցամաքները ներկայացնող երկրներին։ Հատուկ ստեղծված Սահմանադրական հանձնաժողովի յուրաքանչյուր մասնագետ ուսումնասիրելու է մեկ երկրի Սահմանադրություն»։
Ի դեպ, 1980 թվականի սեպտեմբերի 12-ին Թուրքիայի Հանրապետության պատմության ընթացքում տեղի ունեցած ամենաարյունալի ռազմական հեղաշրջումից հետո՝ 1981 թվականի հունիսի 29-ին, թուրքական ռազմական խունտան ընտրեց 160 խորհրդատուի, որոնց հանձնարարեց զբաղվել նոր Սահմանադրության մշակմամբ:
Վերջիններս առաջ քաշեցին 800 նոր օրենքներ: 1982 թվականի նոյեմբերի 7-ին նոր Սահմանադրությունը դրվեց հանրաքվեի ու ստացավ մասնակիցների 92 տոկոսի աջակցությունը: Դրանով մեծ լիազորություններ շնորհվեցին ուժային և դատական կառույցներին, որոնց իրավունքների սահմանափակման համար տարիներ շարունակ պայքարում է Էրդողանը, և առաջիկա նոր Սահմանադրությունը գործուն քայլ կհանդիսանա այդ ուղղությամբ։