Հասարակական-քաղաքական հետազոտությունների կենտրոնը 4+1 ձևաչափով անցկացնում է հասարակական կարծիքի հետազոտություն` կապված ԱԺ ընտրությունների հետ։ Իրականացվելու է չորս հարցում՝ նոյեմբեր, հունվար, մարտ, ապրիլ ամիսներին, հետազոտությունը կեզրափակվի էքզիթ փոլով։
Առաջին փուլն արդեն ավարտվել է, ամփոփվել են հարցումների արդյունքները։ Դրանք անցկացվել են Երևան քաղաքի բոլոր համայնքներում՝ պատահական ընտրության եղանակով: Հարցմանը մասնակցել է 630 մարդ։ Մասնակիցների 54%-ը ( 340 հոգի) կանայք են, 46%-ը՝ տղամարդիկ։
Այսօր կայացած ասուլիսին հասարակական-քաղաքական հետազոտությունների կենտրոնի տնօրեն Զորիկ Մարտիկյանը նշեց, որ այս հարցումներն անցկացվել են ԱԺ ընտրություններից 6 ամիս առաջ, որպեսզի հաջորդաբար կարողանան հետազոտել հասարակության մեջ տեղի ունեցող փոփոխությունները։
Հարցման ուշագրավ կետերից էր այն, թե որ խնդիրներն են ՀՀ-ի համար առաջնահերթ. հարցվածների 26.5%-ը նշել էր սոցիալական արդարությունը, 24%-ը՝ գործազրկությունը, 21.5%-ը ՝ գնաճը, 15.5%-ը՝ արտագաղթը։ Իսկ այն հարցին, թե արդյոք ԱԺ-ն արտացոլո՞ւմ է մարդկանց շահերը, հարցվածների 87%-ը պատասխանել էր՝ ոչ։
Խոսելով հարցման հաջորդ փուլի մասին` Զորիկ Մարտիկյանն ասաց, որ հարցերով նույն մարդկանց չեն դիմի, չեն կրկնվի նաև հարցերը։
