Ինչ-ինչ, բայց պետք է խոստովանել, որ համատեղ պարտիայի շնորհիվ Սերժ Սարգսյանն ու Լևոն Տեր-Պետրոսյանը կարճ ժամանակամիջոցում կարողացան չեզոքացնել ԲՀԿ ազդեցությունը քաղաքական գործընթացի վրա: Այդ ազդեցությունն ավելի շատ ակամա էր: Պարզապես, լինելով խաղի հիմնական վարողները, Տեր-Պետրոսյանն ու Սարգսյանը դուրս էին թողել Ծառուկյանին, որն ակամա հայտնվել էր «արբիտրի» դերում: Խաղի ընթացքում Տեր-Պետրոսյանն ու Սարգսյանը սպառվում էին, իսկ Ծառուկյանն իր այդ դերում հայտնվելով հիմնականում ակամա` շարունակում էր միավորներ հավաքել առավելապես Տեր-Պետրոսյանի և Սարգսյանի ձախողումների շնորհիվ:
Տեր-Պետրոսյանն ու Սարգսյանը համեմատաբար արագ հասկացան այդ իրավիճակը և երկուստեք գործողությունների շնորհիվ կարողացան չեզոքացնել Ծառուկյանի շահեկան «արբիտրաժը»: Նրան պարզապես ակնհայտորեն ներքաշեցին խաղի մեջ: Տեր-Պետրոսյանը, այսպես ասած, իր հայտնի քաղաքագիտական վերլուծությունն արեց, իսկ Սարգսյանն էլ համակարգի ներսում մի կողմից` անուշադրության մատնեց այդ առաջարկությունը և չարտահայտվեց, փոխարենը սկսեց ներքին ճնշումը Ծառուկյանի վրա: Արդյունքում` ԲՀԿ առաջնորդը հայտնվեց ստիպված խաղալու անհրաժեշտության առաջ, քանի որ լռությունն արդեն ոչ թե արբիտրության նշան է, այլ պարզապես խաղից դուրս մնալու: Ծառուկյանը կամ ստիպված է միանալ Տեր-Պետրոսյանի և Սարգսյանի խաղին, ու արդեն ըստ էության խաղալ նրանց փոխարեն, բայց նրանց կանոններով, կամ պետք է նոր խաղ սկսի, ի՛ր խաղը:
Այստեղ արդեն հարցն այն է, թե ով կխաղա Ծառուկյանի հետ: Խոսքը թե ներքին, թե արտաքին խաղացողների մասին է: Ծառուկյանն առայժմ ձեռնպահ է մնում լռությունը խախտելուց, ինչը նշանակում է, որ նա չի գտնում սեփական խաղընկեր: Հնարավոր է նաև, որ ԲՀԿ առաջնորդը պարզապես որոշում է ժամանակից շուտ չսկսել, ինչը մյուս կողմից` նշանակում է, որ նա ըստ էության չունի երկարատև խաղի ռեսուրս: Մինչդեռ Հայաստանում խաղի համար երկար ժամանակ է պահանջվելու, քանի որ խորհրդարանի ընտրությանը հաջորդելու է նախագահի ընտրությունը: Իսկ այդտեղ արդեն ԲՀԿ առաջնորդի համար մանևրի հնարավորությունն ընդհանրապես նվազելու է, քանի որ հունը սկսելու է նեղանալ անձերի մակարդակով, և Գագիկ Ծառուկյանն անխուսափելիորեն պետք է կամ խաղից դուրս գալու մասին հայտարարի, կամ հայտարարի` ում հետ է ինքը կամ ով է իր հետ:
Լուսանկարը` Գագիկ Շամշյանի
