2011 թ. նախորդ տարվա համեմատ որոշակի աշխուժություն նկատվում էր, սակայն ՀՀ տնտեսությունը կարելի է որակել որպես հակասական միտումներ ունեցող, որը կարիք ունի նոր ազգային տնտեսական զարգացման մոդելի: Այսօր լրագրողների հետ հանդիպմանը նման տեսակետ հայտնեց «Այլընտրանք» հետազոտական կենտրոնի ղեկավար, տնտեսագետ Թաթուլ Մանասերյանը:
Ըստ նրա` ՀՀ համար մրցակցային առավելություններ ապահովող ճյուղերից է էներգետիկան, որն անգամ 2009 թ. ճգնաժամային տարում որոշակի կայունություն դրսևորեց:
Բանախոսը դրամավարկային քաղաքականությունը նույնպես դրական գնահատեց, քանի որ 2010 թ. արձանագրված մոտ 10% գնաճը նվազել է և այս տարի սպասվում է մոտ 4%. այս ցուցանիշն արձանագրվեց նաև ԿԲ շնորհիվ: Ըստ Թ.Մանասերյանի` ֆինանսների նախարարության աշխատանքի շնորհիվ ավելի օբյեկտիվ մոտեցում ապահովվեց և ավելի իրատեսական բյուջե կազմվեց:
Թ.Մանասերյանը նշեց` որոշ արդյունքներ նկատվեցին ագրարարային քաղաքականության մեջ, բայց ակնկալիքները չեն արդարացել, իսկ տնտեսության մյուս ոլորտներում, ցավոք, նույն միտումներն են` քիչ տարբերությամբ:
Նրա կարծիքով` մասնավոր հատվածում կան հետաքրքիր զարգացումներ, որոնք ավելի շատ ապագային են միտված: Մանասերյանը հայտարարեց, որ թեև համաշխարհային տնտեսությունում սպասվում է ճգնաժամի սրացում, սակայն Հայաստանն ունի բավարար կարողություն սննդամթերքի պարենային զամբյուղն ապահովելու առումով:
Պատասխանելով «Առաջին լրատվական»-ի հարցին` ինչպե՞ս կարելի է «իրատեսական» կոչել բյուջեն, երբ ԱԺ-ում այն ընդունվեց նվազագույն` 66 ձայնով, որից 2-ը` կեղծ, Թ. Մանասերյանը նշեց. քվեարկությունն «աննախադեպ» էր, քանի որ սովորաբար ձայների շատ մեծ տոկոսով էր անցնում, թեև շատերը նույնիսկ չէին կարդում, պարզապես քվեարկում էին:
Ամեն դեպքում նա բյուջեն անվանեց «իրատեսական», իսկ եկամուտների հավաքագրման ավելացման աղբյուրը, ըստ նրա, պետք է լինի ստվերային տնտեսությունը:
Մեր հարցին` որքանո՞վ է ճիշտ գնաճը համարել 4%, երբ հասարակությունը խիստ բևեռացված է, և աղքատների թիվը գնալով ավելանում է, Թ. Մանասերյանը պատասխանեց` իրենք առաջարկել են անապահով խավի համար նվազագույն զամբյուղի հաշվարկ կատարել. «Ժամանակն է, որ կյանքի կոչվի «Նվազագույն զամբյուղի մասին օրենքը», որը կարտացոլի իրական պատկերը, քանի որ աղքատ խավի համար կարևոր են ոչ թե հաշվարկված 500 անուն ապրանքների գները, այլ առաջին անհրաժեշտության ապրանքների»:
Բանախոսը խոստացավ հաջորդ տարեսկզբին հրապարակել իրենց հաշվարկած 10 անուն ապրանքների գնաճի ցուցանիշները:
Միաժամանակ, բանախոսը նշեց, որ պաշտոնական վիճակագրությունն իրական գործազրկության հետ կապ չունի, այն ավելի բարձր է. «Նաև պետք է հաշվի առնել, որ կա ոչ միայն ստվերային գործազրկություն, այլև կա ստվերային զբաղվածություն»:
