Արտախորհրդարանական ընդդիմության հետ երկխոսությունը հայ իրականության մեջ նոր երևույթ էր, այլ բան է, որ երկխոսությունը մեր ակնկալած արդյունքները չտվեց: Այսօր կայացած մամուլի ասուլիսին հայտարարեց ՀՀԿ-ական պատգամավոր Հովհաննես Սահակյանը:
«Ամեն դեպքում, կարծում եմ, իշխանության և ընդդիմության միջև քննարկումները պետք է շարունակվեն նաև հաջորդ տարի` կազմելով քաղաքական դաշտի մեխերից մեկը»,- ասաց նա:
Ասուլիսի մյուս բանախոս, ՀՅԴ պատգամավոր Արծվիկ Մինասյանն իր հերթին նկատեց, որ այդ երկխոսությունը որևէ խնդրի լուծմանն ուղղված չէր:
««Էրեբունի» հյուրանոցի մի անկյունում իրար հետ գալաջի անելը որևէ հարց չլուծեց, և շատ ավելի լավ կլիներ, եթե ՀԱԿ-ը գար, կանգներ ՀՅԴ-ի կողքին և Ընտրական օրենսգրքի փոփոխություններ պահանջեր: Ցավոք, ընտրություններն ավարտվել են մինչև ընտրությունները. գնված ձայներն ուղղակի այդ օրը տարվելու են ընտրատեղամասեր:
Որպեսզի հասարակությունն սկսի վստահել իշխանություններին, ապա իշխանությունը, ցուցաբերելով կամք, պետք է «տուն ուղարկի» կառավարությանը: Քաղաքացին պիտի տեսնի, որ իրավիճակից կախված` իշխանությունը ադեկվատ քայլեր է ձեռնարկում»,- նկատեց նա: