2011-ը սկսվեց նախագահի մի շարք հանձնարարականներով, սակայն, ցավոք, ողջ տարվա ընթացքում դրական առումով ոչինչ չունեցանք: Այսօր կայացած մամուլի ասուլիսին այս մասին հայտարարեց ՀՅԴ պատգամավոր Արծվիկ Մինասյանը:
«Անցնող տարվա ընթացքում կատարված աշխատանքները ոչ միայն դրական արդյունքներ չտվեցին, այլև աղքատ բնակչության թվաքանակն ավելացավ` հասնելով 1 մլն 200 հազարի: Ինչ վերաբերում է իշխանությունների կողմից իրականացված արտաքին քաղաքականությանը, ապա առաջընթաց չգրանցվեց ո՛չ ղարաբաղյան հարցի կարգավորման, ո՛չ հայ-թուրքական հարաբերությունների, ո՛չ էլ ջավախահայության խնդիրների լուծման ուղղությամբ:
Միաժամանակ օբյեկտիվ հիմքեր չկան` կարծելու, թե կայանալիք խորհրդարանական ընտրությունները արդար ու թափանցիկ են լինելու»,- նկատեց պատգամավորը:
Արծվիկ Մինասյանի համոզմամբ` անցնող տարում ՀՅԴ-ն ցույց տվեց, որ ինքն ակտիվ և պայքարող քաղաքական ուժ է: «Միաժամանակ, 2012-ին պետք է փորձենք կոռեկտություն պահել »,- նկատեց խորհրդարանականը:
Ասուլիսի մյուս բանախոս, ՀՀԿ-ական պատգամավոր Հովհաննես Սահակյանն իր հերթին նկատեց, որ անցնող տարում փորձ կատարվեց դրական բարեփոխումներ իրականացնել, այդ թվում` խորհրդարանական ընդդիմության հետ:
«Դրա օրինակը հարկային վերջին փաթեթն էր, որին կողմ քվեարկեց ամբողջ խորհրդարանը: Իհարկե, չենք ժխտում, որ կան սոցիալական խնդիրներ, որոշակի դժվարություններ: Այդ է պատճառը, որ մենք պետք է հասարակության մեջ վստահություն սերմանենք:
Այսօր հանդուրժողականության ճգնաժամ է: Բայց ՀՀԿ-ն, լինելով իշխանություն, հայտարարում է, որ 2012-ի խորհրդարանական և 2013-ի նախագահական ընտրությունները մեր նորանկախ պետության պատմության ընթացքում կլինեն ամենաազատն ու թափանցիկը. մենք այդ կամքն ունենք: Միաժամանակ կառուցողական կամք պետք է դրսևորեն քաղաքական մյուս ուժերը ևս»,- ասաց ՀՀԿ-ական պատգամավորը:
Արծվիկ Մինասյանն անհասկանալի համարեց ՀՀԿ այդ վստահությունը` նկատելով, որ այն սոցիալական բազան, որ հաստատվել է մեր երկրում, չի կարող թույլ տալ Հայաստանում ազատ ու արդար ընտրություններ անցկացնել:
«Թող իշխանությունը հայտարարի, որ ընտրությունների ժամանակ բոլոր ընտրատեղամասերում տեղադրվելու են տեսաձայնային սարքեր, պատժվելու են ընտրակաշառք բաժանողները, այդ ժամանակ միայն հնարավոր կլինի հավատալ, որ ընտրությունները, ինչպես հայտարարում են իշխանությունները, անթերի կանցնեն»,- նկատեց նա: