Շաբաթ օրը Մարտակերտի դատախազության քննիչը հիվանդանոցում հարցաքննել է օրեր առաջ սպայի կողմից աջ աչքից զրկված Նարեկ Ավետիսյանին: «Առաջին լրատվական»-ի հետ զրույցում տեղեկացրեց Նարեկ Ավետիսյանի հայրը՝ Անդրանիկ Ավետիսյանը:
Խոսելով տղայի առողջության մասին`նա ասաց, որ ցավեր է ունենում: «Ունենում է ցավեր, ցավազրկում են: Այս պահին դրությունն այսպիսին է: Մեր համարձակությունը դեռ չի ներում, որպեսզի հայտնենք, որ էլ չի տեսնելու»,- մանրամասնեց Ա. Ավետիսյանը`հավելելով, որ տղային տեսակցության են եկել և ոստիկանությունից, և Պաշտպանության նախարարությունից, և Զինվորի պաշտպանության կոմիտեից:
Նարեկի հայրը համոզված է, որ մեղավորը իր կատարած հանցանքին համապատասխան պատիժ է կրելու: «Ես կցանկանայի տեսնել նրան, բայց ինձ թույլ չեն տա: Շատ էի ցանկանում հանդիպել, բայց…»,- նշեց Ա. Ավետիսյանը`հավելելով, որ փորձելու է իր ծնողական պարտքը կատարել:
Հիշեցնենք, որ դեկտեմբերի 14-ին` ժ. 07:20-ի սահմաններում ԼՂՀ N զորամասի ճաշարանի պետ, ենթասպա Արմեն Լավրենտի Թովմասյանը, իր հանձնարարությունից հրաժարվելու պատճառով զորամասի ճաշարանում մեկ անգամ ձեռքով, ապա ձեռքին գտնվող երկաթյա շղթայով հարվածել է նույն զորամասի ժամկետային զինծառայող Նարեկ Ավետիսյանի դեմքին: Վերջինիս պատճառվել է մարմնական վնասվածք` աջ ակնագնդի ջնջխմամբ, վերին կոպի հեմատոմայի տեսքով: Երևանի Մալայանի անվան ակնաբուժական կլինիկայում հեռացվել է այս տարվա գարնանային զորակոչին Էջմիածնից զորակոչված 18-ամյա ժամկետային զինծառայող, շարքային Նարեկ Ավետիսյանի աջ աչքը:
