Facebook ընկերությունը սպառնացել է դատական հայց ներկայացնել այն մարդու նկատմամբ, ով վերջերս իր անունը փոխել և դարձրել է Մարկ Ցուկերբերգ` ընկերության հիմնադրի անունով:
Ինչպես արդեն հաղորդել ենք, իսրայելցի ձեռնարկատեր Ռոտեմ Գուեզտոն օրինական փաստաթղթերով փոխել է իր անունը Մարկ Ցուկերբերգի: Նա անգամ ունի մի կայք՝ MarkZuckerbergOfficial.com անունով, որտեղ բացատրում է, թե ինչու է արել անվանափոխությունը:
Անվանափոխությունը տեղի է ունեցել, քանի որ իսրայելցի ձեռնարկատերը խախտել է ընկերության որոշ օրենքներ` կապված կայքում գովազդ տեղադրելու հետ: Ընկերությունն այնուհետև արգելափակել է նրա մուտքն իր էջ, որի պատճառով էլ իսրայելցին փոխել է իր անունը` հայտարարելով, որ կարծում է, թե զվարճալի կլինի, եթե ընկերությունը դրանից հետո դատական հայց ներկայացնի հենց Մարկ Ցուկենբերգի անունով:
TG Daily-ն հայտնում է, որ, այնուամենայնիվ, անվանափոխությունից մեկ շաբաթ անց, Facebook ընկերությունը կեղծ Ցուկենբերգին ուղարկել է հերթական նամակը` հայտնելով, որ եթե նա շարունակի խախտել կայքի օրենքերը և ոտնահարի կայքից օգտվողների իրավունքները, ապա նրա դեմ ընկերության կողմից դատական հայց կներկայացվի:
