Պաղեստինյան «ՀԱՄԱՍ» շարժումը, որը վերահսկում է Գազայի հատվածը, փոխելու է Իսրայելի դեմ պայքարի ռազմավարությունը` զինված պայքարից անցնելով ոչ բռնի գործողությունների:
Այս մասին գրում է The Guardian-ը՝ հղում անելով կազմակերպության պաշտոնական ներկայացուցիչ Թախիր Ալ-Նունի հայտարարությանը:
«Բռնությունը այլևս չի կարող դիտվել որպես հիմնական մեթոդ: Սակայն եթե Իսրայելը մեզ վրա ճնշում գործադրի, մենք իրավունք ունենք դիմակայելու»,- ասել է Գազայի փաստացի ղեկավարի օգնական Իսմայիլ Հանիային:
Ընդ որում, Նունը ավելացրել է, որ հիմնական պաղեստինյան խմբավորումները Գազայի հատվածում պայմանավորվել են դադարեցնել Իսրայելին ուղղված հրթիռային կրակոցները:
Ինչպես նշում է պարբերականը, «ՀԱՄԱՍ»-ը ստիպված էր վերանայել պայքարի իր մեթոդները Պաղեստնի առաջնորդ Մահմուդ Աբբասի ճնշման տակ, որի հետ ներկայումս բանակցություններ է վարում «ազգային միասնական» կառավարություն ստեղծելու համար: Բացի այդ, կազմակերպության առաջնորդների հայացքները փոխվել էին արտաքին հանգամանքների հետ կապված, մասնավորապես՝ արաբական երկրներում հեղափոխությունների հետ:
«ՀԱՄԱՍ»-ը փորձում է եգիսպտական «Մուսուլման եղբայրներ» կազմակերպության նման փոխել իր հեղինակությունը, որը աշխարհում երկար ժամանակ համարվում էին ահաբեկչական խմբավորում, սակայն հեղափոխությունից հետո արժանացել է «չափավոր իսլամիստ» կոչմանը և դարձել է քաղաքական հարգարժան ուժ:
Բացի այդ, «ՀԱՄԱՍ»-ը, վատացնելով իր հարաբերություները Սիրիայի և Իրանի հետ, ստիպված է իր համար նոր հովանավոր գտնել` Թուրքիայի և Կատարի գլխավորությամբ, իսկ այդ երկու երկրները համարում են, որ Իսրայելի հետ ուղիղ զինված հակամարտությունը ոչ մի արդյունքի չի բերի:
«ՀԱՄԱՍ»-ը նաև առաջին անգամ պաշտոնապես համաձայնել է ճանաչել պաղեստինյան պետությունը 1967 թվականի սահմաններով և համաձայնել է Իսրայելի հետ բանակցել, եթե միջազգային քառյակը հանի նախնական պայմանների մի մասը, որոնք նախատեսված էին այդ բանակցությունների համար:
Շարժման առաջնորդները նախկինում կտրականապես հրաժարվում էին բանակցել հրեաների հետ և պահանջում էին ստեղծել պաղեստինյան պետություն ոչ միայն արաբական հողերի, այլև իսրայելական տարածքների վրա:
Իսրայելի իշխանությունները դեռ չեն արձագանքել «ՀԱՄԱՍ»-ի պայքարի մեթոդների փոփոխման մասին հռչակագրին: Ավելի վաղ Երուսաղեմը հայտարարել էր, որ շարժման հետ երկխոսությունը հնարավոր կլինի սկսել այն դեպքում, եթե նա ճանաչի նախկինում կնքված համաձայնությունը` հրաժարվել բռնությունից և ճանաչել Իսրայելի գոյությունը:
