Դեռ 1 ամիս առաջ Ասիական զարգացման բանկը հաստատել է Հայաստանին մինչև 65 միլիոն ԱՄՆ դոլարի վարկի տրամադրումը. նպատակը երկրում փոքր և միջին բիզնեսն ընդլայնելն է: Սակայն մինչ օրս հայկական բանկերը չեն ստացել վարկը:
Ինչպես «Առաջին լրատվական»-ին պարզաբանեցին ԱԶԲ-ի հայաստանյան գրասենյակից, բանկերը դեռ չեն ներկայացրել անհրաժեշտ փաստաթղթերը: «Երբ բանկերը ներկայացնեն փաստաթղթերը, վարկը կտրամադրվի»,- հավաստեցին բանկից:
Վարկը տրամադրվելու է հայկական չորս բանկերի՝ «ACBA կրեդիտ ագրիկոլ», «Արդշինինվեստ», «Ամերիա» և «Ինեկո», հինգ տարի ժամկետով, որոնք էլ կտրամադրվեն փոքր ու միջին բիզնեսով զբաղվող ձեռնարկություններին: Վերջիններս կազմում են երկրի ձեռնարկատիրության գրեթե 98%-ը՝ ապահովելով ՀՆԱ-ի ու զբաղվածության 40%-ը:
Այս վարկային ծրագիրն ունի մի շարք նոր մոտեցումներ, ներառյալ այն պայմանը, որ բիզնես վարկեր պետք է տրամադրվեն նաև Երևանից դուրս, որտեղ աղքատության սանդղակն ավելի բարձր է ու ֆինանսավորման հնարավորությունն ավելի սահմանափակ:
ԱԶԲ-ն բանկերին կտրամադրի նաև փորձագիտական աջակցություն ՓՄՁ-ներին ավելի ընդլայնված ծառայություններ մատուցելու համար:
