2012 թվականի հունվարի 1-ից Շվեյցարիայի նախագահ, ԱԳ նախարար Միշլին Քալմի Ռեյին այդ պաշտոնում կփոխարինի երկրի ֆինանսների նախարար Էվելին Վիդներ-Շլումփֆը: «Առաջին լրատվական»-ի հետ զրույցում այս մասին հայտարարեց Շվեյցարիա-Հայաստան ընկերակցության պատվո նախագահ Սարգիս Շահինյանը:
«Միշլին Քալմի Ռեյն այլևս կառավարության կազմում չէ: Ինչ վերաբերում է երկրի ԱԳ նախարարի նոր պաշտոնակատարին, ապա նա մինչ այժմ ներքին գործերի նախարար Դիդյե Բուրգհալթերն է, ով ևս աշխատանքի կանցնի 2012-ի հունվարի 1-ից»,- ասաց նա:
Հարցին՝ ի՞նչ հնարավոր դերակատարություն կարելի է սպասել Քալմի Ռեյին փոխարինած Վիդներ-Շլումփֆից հայ-թուրքական արձանագրությունների հետագա ճակատագրի առումով, Սարգիս Շահինյանը նկատեց. «Նախևառաջ, Միշլին Քալմի Ռեյի հեղինակությունը, ոչ միայն որպես ԱԳ նախարար, այլ նաև որպես նախագահ, շատ մեծ էր: Նա, ժողովրդական լեզվով ասած, «քթի ծակ» ունեցող, հմուտ քաղաքական գործիչ էր, շատ զգայուն էր հայ-թուրքական հարաբերությունների կարգավորման անհրաժեշտության հարցում: Միաժամանակ, հայ-թուրքական հարաբերությունների կարգավորման գործընթացը կանգ է առել ոչ թե շվեյցարացի պաշտոնյաների փոփոխությամբ պայմանավորված, այլ այն պատճառով, որ գործընթացն ի սկզբանե սխալ հիմքերի վրա էր դրված: Այն կեղծավոր առաջարկը, որ Թուրքիայի ԱԳ նախարար Ահմեդ Դավութօղլուն արեց Քալմի Ռեյին դեկտեմբերին, միայն աչքերին «թոզ փչելու» մակարդակի մի նախաձեռնություն էր»,- ասաց Շվեյցարիա-Հայաստան ընկերակցության պատվո նախագահը:
Ամփոփելով՝ Սարգիս Շահինյանը նկատեց, որ հայ-թուրքական հարաբերությունների կարգավորման հետագա ճակատագիրը Շվեյցարայի հին կամ նոր նախագահի փորձառությունից կախված չէ: «Բուն խաղը Շվեյցարիայում չէ, ոչ էլ ԱՄՆ-ում, բուն խնդիրն Անկարայում է: Որքան էլ խելացի, հմուտ, փորձառու անձնավորություն զբաղեցնի Շվեյցարիայի նախագահի պաշտոնը, չի կարող հրաշքներ գործել»,- ասաց Շահինյանը՝ միաժամանակ հավելելով, որ Էվելին Վիդներ-Շլումփֆը ևս փորձառու, խելացի քաղաքական գործիչ է:
