Արտակ Նազարյանի գործով առանցքային վկան ճնշումների է ենթարկվել: Այսօր լրագրողների հետ հանդիպմանը նման հայտարարությամբ հանդես եկավ Արտակ Նազարյանի իրավահաջորդը` Ծովինար Նազարյանը (Արտակի քույրը): Նա ասաց, որ նախաքննության ընթացքում կատարվել են բազմաթիվ ապօրինություններ: Ծ. Նազարյանը ներկայացրեց տուժող կողմի պատրաստած հայտարարությունը, ըստ որի` Արման Մնացականյանը` գործով առանցքային վկան, դեռ անցյալ տարի պետք է զորացրվեր:
«Ա. Մնացականյանից նախաքննական ցուցմունքները ձեռք են բերվել ապօրինաբար: Ռազմական ոստիկանության կողմից նրա վրա ճնշումներ են գործադրվել` դեպքից հետո նրան և մի քանի այլ զինծառայողների տարել են Բերդ քաղաքի ռազմական ոստիկանություն և պահել քսաներեք օր: Դատարանում Ա. Մնացականյանը նաև նշել է` հայտնի չէ, թե իրեն երբ են զորացրելու: Վկան ապօրինաբար պահվել է ռազմական ոստիկանությունում: Նա նույնիսկ դատարանի դահլիճ ներկայանում է ռազմական ոստիկանների ուղեկցությամբ»,- նշեց Ծ. Նազարյանը` հավելելով, որ առանցքային վկայի ցուցմունքներում հակասություններ կան: Այդ հակասությունները պայմանավորված են նրանով, որ ցուցմունքները ձեռք են բերվել ապօրինի ճանապարհով:
Համատեղ ասուլիսի ընթացքում իրավահաջորդի ներկայացուցիչ Ռուբեն Մարտիրոսյանն ասաց, որ պաշտպանության նախարարի հետ հանդիպումից հետո անակնկալի է եկել և զարմացել, որ նա չի կարող հարցեր լուծել: Ըստ իրավապաշտպանի` երբ նա նախարարի հետ հանդիպման ժամանակ հայտարարել է նախարարության ենթակայության տակ գտնվող քննչական ծառայության և ռազմական ոստիկանության հանցավոր կառույցներ լինելու մասին, որոնք կոծկել են Արտակ Նազարյանի սպանության գործը, նախարարը շրջվել է և ասել` ի՞նչ կարող եմ անել:
«Մենք տեսանք, որ նա ի զորու չէ որևէ հարց լուծել: Վկային զորացրելու հարցը` այդ չնչին հարցը, նույնպես չի կարող լուծել»,- մեկնաբանեց Ռ. Մարտիրոսյանը` ընդգծելով, որ նախարարը «անօգնական է»:
Տուժող կողմի հայտարարությանը միացավ մեղադրյալ Հակոբ Մանուկյանի պաշտպան Հրանտ Գևորգյանը: Նրա խոսքով`սա բացառիկ դեպք է, երբ պաշտպանական կողմը և տուժողը մեկ հայտարարությամբ են հանդես գալիս: Նրա համոզմամբ` Ա. Մնացականյանի նկատմամբ ճնշումները խոչընդոտում են, որպեսզի բացահայտվի առաջադրված մեղադրանքի բուն էությունը:
Ըստ Արտակ Նազարյանի իրավահաջորդի ներկայացուցիչ Ռոբերտ Շուշանյանի` իրենք գործ ունեն հանցավոր ճանապարհով ստացված ցուցմունքների հետ: Ասուլիսին ներկա բանախոսները ներկայացրին գործում առկա բազմաթիվ հակասությունները:
