Հաագայում ՄԱԿ-ի Միջազգային քրեական դատարանի (ՄՔԴ) գլխավոր դատախազ Լուիս Մորենո Օկամպոն հայտարարել է, որ «լուրջ հիմքեր կան» Լիբիայի նախկին առաջնորդ Մուամար Քադաֆիի մահը ռազմական հանցագործություն համարելու:
«Մուամար Քադաֆիի մահն այն հարցերից է, որոնք պարզաբանության կարիք ունեն… Քանի որ լուրջ կասկածներ կան, որ դա ռազմական հանցագործություն է»,- ՄԱԿ-ի Անվտանգության խրհրդի նիստից հետո ասել է Մորենոն Օկամպոն լրագրողներին:
Ինչպես հաղորդում է Associated Press-ը, Օկամպոն պատմել է, որ նամակ է ուղարկել Լիբիայի Ազգային անցումային խորհրդին՝ խնդրելով իրեն տրամադրել հնարավոր ռազմական հանցագործությունների գործով նոր կառավարության ծրագրերը: Խոսքը նաև այն հացագործությունների մասին է, որոնք իրականացվել են ապստամբների կողմից:
Նրա խոսքերով՝ Լիբիայի նոր կառավարությունը իրեն պետք է պատասխան տա մինչև հունվարի 10-ը:
Գլխավոր դատախազը նշել է, որ Միջազգային քրեական դատարանի հետագա գործողությունները կախված կլինեն Լիբիայի իշխանությունների գործունեությունից, քանի որ ՄՔԴ-ն իրավունք ունի միջամտել միայն այն դեպքում, երբ իշխանությունները չեն ցանկանում կամ չեն կարողանում որևէ բան անել:
