Կենտրոն և Նորք-Մարաշ վարչական շրջանների ընդհանուր իրավասության դատարանում հինգշաբթի օրն ավարտվել է «Արմավիա»-ն ընդդեմ «Չորրորդ ինքնիշխանություն» թերթի գործով դատավարությունը:
Կողմերը հաշտության համաձայնության են եկել. «Չորրորդ ինքնիշխանություն»-ը պարտավորվել է հերքում տպագրել, իսկ «Արմավիա» ընկերությունը հրաժարվել է զրպարտության, գործարար համբավն արատավորող տեղեկություններ հրապարակելու համար որպես փոխհատուցում 2 միլիոն դրամի պահանջից:
Թերթի լրագրող Գոհար Վեզիրյանն «Ազատություն» ռադիոկայանի հետ զրույցում փոխանցել է, որ միևնույն է չեն ընդունում, որ զրպարտել են ազգային ավիափոխադրող ընկերությանը:
«Մենք գնացինք դատական նիստի, որպեսզի հասարակությունը, լրատվամիջոցները իրականում հասկանան, թե որն է խնդիրը, և, ըստ էության, դատական նիստերի ժամանակ պարզվեց այն իրողությունը, ինչ-որ «Չորրորդ ինքնիշխանությունը» պնդում էր, որ մենք բարեխիղճ, բառացի վերարտադրություն ենք արել, և Բաղդասարովի հայցն ընդդեմ «Չորրորդ ինքնիշխանության» ի սկզբանե անհեթեթ է եղել: Մենք հիմա էլ պնդում ենք, որ իրենց պահանջը անհեթեթ է եղել: Երկու անգամ հերքված բանը եթե մարդիկ ուզում են երրորդ անգամ հերքել, իրենց են դնում անհեթեթ վիճակի մեջ»:
Հիշեցնենք, «Չորրորդ ինքիշխանություն» թերթը ««Արմավիան» զենք է մատակարարել» վերնագրի ներքո, որում հղում կատարելով epress.am կայքին, գրել էր, թե Մոլդովայի ազգային բանակի հրամանատար Յուրի Դոմինիկը հայտարարել էր, որ զենք փոխադրելու նպատակով Լիբիայից Մոլդովա ժամանակ ԻԼ-76 ինքնաթիռը պատկանում է Հայկական քաղաքացիական ավիաընկերությանը»:
«Արմավիա»-ն հայցում նշել էր, որ թերթը բարեխղճորեն չի արտատպել այս լուրը` փոխել է վերնագիրը և լուրի կողքին տպագրել է «Արմավիա» ընկերության տարբերանշանով ինքնաթիռի լուսանկար:
Ընկերության փաստաբանը հրաժարվել է պատասխանել «Ազատություն» ռադիոկայանի հարցերին:
