Ռուսական ВЗГЛЯД թերթի փոխանցմամբ՝ 2012 թվականի սկզբին «Մաեստրո» հեռուստաալիքի եթերում հայտնվելու է «Բանանային հանրապետություն, ուր չկան բանաններ» երգիծական մուլտսերիալը։
Դրանում հեգնում են նախագահ Միխեիլ Սաակաշվիլիին և երկրի իշխանությունների մյուս ներկայացուցիչներին։ Մուլտսերիալի հակահերոսների թվում են ընդգրկվել նաև ներքին գործերի նախարար Վանո Մերաբիշվիլին, էկոնոմիկայի ու կայուն զարգացման նախարար Վերա Կոբալիան, արդարադատության նախարար Զուրաբ Ադեիշվիլին և այլք։
Նախագիծը ղեկավարում է հայտնի հեռուստալրագրող Շալվա Ռամիշվիլին, իսկ ֆինանսավորում է ընդդիմադիր միլիարդատեր Բիձինա Իվանիշվիլին։
Նշվում է, որ 1990-ական թվականների վերջին և 2000-ական թվականների սկզբին Շալվա Ռամիշվիլին համանման մուլտֆիլմ էր նկարահանել տվյալ ժամանակվա նախագահ Էդուարդ Շևարդնաձեի մասին, և դրանով իսկ զգալիորեն հարվածել նրա վարկանիշին։ Խոսքը «Դարդուբալա» մուլտֆիլմի մասին է։
Այդ մուլտֆիլմի կապակցությամբ հետագայում Շևարդնաձեն հայտարարել էր, թե այն իրեն շատ էր զայրացրել, սակայն չի արգելել՝ ելնելով ժողովրդավարության նկատառումներից։
