Աֆղան կինը, ով բանտարկվել էր ամուսնական «անհավատարմության» մեղադրանքով այն բանից հետո, երբ նրա բարեկամներից մեկը բռնաբարել էր նրան, դատարանի որոշմամբ ազատ է արձակվել:
«Նրան ազատ են արձակել երեկ գիշերը, և նա ուրախ է, որ ապահով վայրում է»,– այսօր ասել է կնոջ դատապաշտպան Քիմբերլի Մոթլին:
Reuters-ը գրում է, որ Աֆղանստանում ամուսնության ընթացքում այլ տղամարդու հետ սեռական հարաբերություն ունենալը, եթե անգամ դա բռնաբարություն է եղել, այն մի քանի «բարոյական մեղքերից» է, որոնց պատճառով կանայք կարող են բանտարկվել: Բռնացող ամուսնուց կամ հարկադրված ամուսնությունից փախչող կանայք նույն պատժին են արժանանում:
Հիշեցնենք, որ 21-ամյա Գյուլնազը, ում 2009 թվականին բռնաբարել էր իր զարմիկի ամուսինը, դատապարտվել էր 2 տարվա ազատազրկման` «բռնի ուժով ամուսնական անհավատարմության» մեղադրանքով: Կինը բանտում երեխա է ունեցել:
