Փոքր ու միջին ձեռնարկությունները չեն կարողանում զարգանալ, նորմալ աշխատանք կազմակերպել, որովհետև բանկային տոկոսադրույքները չափազանց բարձր են: «Առաջին լրատվական»-ի հետ զրույցում նման կարծիք հայտնեց ԱԺ տնտեսական հարցերի մշտական հանձնաժողովի անդամ, գործարար Գոհար Ենոքյանը:
Նա նշեց, որ զարգացած երկրներում ՓՄՁ-ներին տարեկան 3-4%-ով են վարկավորում տրամադրում, որ կարողանան ոտքի կանգնել: «Մեզ մոտ կաշի են քերթում բանկերը»,- ասաց Գ. Ենոքյանը:
Պատգամավորի խոսքով, հայտարարում են, թե 10%-ով վարկեր կան, բայց հազարից մեկի բախտն է բերում, որ այդ տոկոսադրույքով վարկ վերցնի, նաև առանց գրավի վարկ չեն տրամադրում: Փաստացի վարկավորումը սկսվում է 11-12%-ից, ինչն, ըստ Գ. Ենոքյանի, փոքրերի համար չափազանց մեծ տոկոս է. «Գուցե ներկրողները կարողանան դա մարել, որ վաճառքով են զբաղվում, բայց արտադրության համար շատ-շատ է: ՓՄՁ-ները պետք է 6%, առավելագույնը 7%-ից ավելի թանկ վարկ չստանան: Կառավարությունն իրոք պետք է դեմքով դեպի միջինը շրջվի: Եվ ասելը քիչ է, պետք է անել»:
