«Հայելի» ակումբի այսօրվա հյուրերն էին Գագիկ Սարուխանյանը («Խաչակիր» հ/կ խորհրդի նախագահ), Խաչատուր Մարոզյանը (զինվորական փորձագետ) և Ա. Սաքունցը` Հելսինկյան քաղաքացիական ասամբլեայի Վանաձորի գրասենյակի տնօրեն: Նրանք բանավիճում էին` քննարկելով բանակում ստեղծված իրավիճակը:
Բանախոսները բուռն քննարկում ծավալեցին, թե արժե՞ արդյոք համագործակցել ՊՆ-ի հետ: Գագիկ Սարուխանյանը և Խաչատուր Մարոզյանը կարևորում էին սպանված զինվորի ընտանիքին բարոյապես աջակցելը, հուղարկավորությունները կազմակերպելը, դպրոցներում ռազմահայրենասիրական դասընթացներ անցկացնելը:
Մինչդեռ Արթուր Սաքունցը նշում էր, թե իրենք իրենց պատկերացրած ձևով են համագործակցում, կոնկրետ հարցերի պատասխաններ հաճախ չի հաջողվում ստանալ:
Գագիկ Սարուխանյանը նշեց, թե անշուշտ դիմելու և առաջարկելու են իշխանություններին, որպեսզի բանակում եղած բացթողումները կանխվեն: Նրա կարծիքով` իրավիճակը կարելի է շտկել հենց բանակի ուժով:
Գագիկ Սարուխանյանը և Խաչատուր Մարոզյանը կողմնակից էին վերլուծական կենտրոններ ստեղծելուն, որպեսզի կատարվեն ուսումնասիրություններ:
Ըստ Արթուր Սաքունցի` մարդկանց պատասխանատվության ենթարկելու մեխանիզմը գոյություն ունի, պարզապես գործընթացն է խեղվում:
Գագիկ Սարուխանյանը և Խաչատուր Մարոզյանը առաջարկում էին պայքարել համախմբված և սկսել հենց դպրոցներից, սերմանել հայրենասիրություն, քանի որ «ամեն ինչ փտած է»:
Ա. Սաքունցը համաձայնեց գնահատականի հետ` իսկապես «ամեն ինչ փտած է», ուստի կոչ արեց ընտրություններից առաջ համախմբվել և միանալ ընտրախախտումների դեմ պայքարին:
Խաչատուր Մարոզյանը համամիտ էր, որ բանակում անհրաժեշտ է կատարել համակարգային փոփոխություններ:
