ИТАР-ТАСС-ի փոխանցմամբ՝ ԱՄՆ Կոնգրեսի Ներկայացուցիչների պալատի հետախուզության գծով հատուկ կոմիտեի նախագահ Մայք Ռոջերսը հերքել է այն տեղեկատվությունը, թե Իրանն է վայր գցել իր արևելյան հատվածում (իրանա-աֆղանական սահմանից մոտ 225 կիլոմետր հեռավորության վրա) հայտնված ամերիկյան RQ-170 անօդաչու թռչող սարքը (ԱԹՍ)։
Ըստ Ռոջերսի՝ ամերիկյան ԱԹՍ-ի վայր ընկնելու պատճառը նրանում առաջացած տեխնիկական խնդիրներն են. «Իրանցիները վայր չեն գցել այն և ոչ էլ հարկադիր վայրէջք են պարտադրել՝ գործի գցելով ռադիոէլետրոնային պայքարի միջոցները։ Որևէ արտաքին ուժ ԱԹՍ-ին չի հարկադրել վայրէջք կատարել։
Ես կարող եմ ասել, որ այն վայրէջք է կատարել տեխնիկական պատճառներով։
Ինձ մտահոգում է այն, որ իրանցիները դրա շնորհիվ կարող են իրազեկվել Պենտագոնի ռազմական տեխնոլոգիաների գաղտնիքներից։ Սակայն մինչև իրանցիներն աշխատեն դրա վրա, ԱՄՆ-ը որևէ նոր բան կհնարի»։
Հիշեցնենք, որ ԱՄՆ նախագահ Բարաք Օբաման Իրանին խնդրել էր վերադարձնել իրենց ԱԹՍ-ն, սակայն Իրանը մերժել է դա՝ պահանջելով իր օդային սահմանի խախտման համար ներողություն խնդրել։
Այժմ անգամ նշվում է, որ Իրանը Ռուսաստանին առաջարկել է ծանոթանալ ամերիկյան նորագույն այդ ԱԹՍ-ի ռազմական տեխնոլոգիաներին՝ ռուսական C-300 համալիրների ստացման դիմաց։