Ամերիկյան Microsoft ընկերության հիմնադիրներից մեկը՝ Փոլ Ալենը, հայտարարել է, որ աշխատում է նոր անօդաչու թռչող սարք ստեղծելու ուղղությամբ՝ տիեզերք թռչելու և ուղեծիր բեռներ տեղափոխելու համար:
Ինչպես հաղորդում է BBC-ն, 58-ամյա գործարարը հայտարարել է, որ Stratolaunch Systems անվանումով իր նոր նախագծով նախատեսվում է ստեղծել հսկայական ինքնաթիռ, որը կարող է թռչել մեծ բարձրության վրա և որից հրթիռներ կարձակվեն դեպի տիեզերք:
Նախագծի իրականացման գործում Ալենին կօգնի օդատիեզերաբանական տեխնիկայի հայտնի ամերիկացի կոնստրուկտոր Բերտ Ռուտանը:
Մշակողները հույս ունեն, որ սարքի միջոցով ուղեծիր կուղարկվեն կոմերցիոն արբանյակներ և բեռներ կտեղափոխվեն Միջազգային տիեզերակայան:
Սարքը հագեցված կլինի Boeing 747 ինքնաթիռի 6 շարժիչով, նրա թևերի երկարությունը կլինի 117 մետր:
Դա նշանակում է, որ Stratolaunch Systems նախգծի շրջանակներում ի հայտ կգա աշխարհի ամենամեծ թռչող սարքը, որն իր չափերով կգերազանցի հայտնի «Հյուզ H-4 Հերկուլեսին»:
Նոր սարքի առաջին թռիչքը նախատեսվում է 2016 թ.: Նրա շինարարական աշխատանքներն արդեն սկսվել են: Ռուտանի և Ալենի խոսքերով կոնստրուկտորները Stratolaunch Systems կառուցվածքի վրա աշխատում են արդեն շուրջ 10 տարի:
Ալենը և Ռուտանը իրենց նոր ծրագրի մասին հայտարարեցին այն բանից հետո, երբ ՆԱՍԱ ամերիկյան տիեզերական ընկերությունը վերջնականապես դադարեցրեց դեպի տիեզերք թռիչքների սեփական ծրագիրը:
