Գերմանիայի նախագահ Քրիստիան Վուլֆին կասկածում են խաբեության մեջ`մասնավոր ձեռնարկատերից արտոնյալ վարկ ստանալու համար: Դեպքը տեղի է ունեցել այն ժամանակ, երբ Վուլֆը դեռ Ստորին Սաքսոնիայի վարչապետն էր: Bild թերթի տվյալներով՝ Վուլֆը կնոջ հետ 2010 թվականի փետրվարին 500 հազար եվրո վարկ է վերցրել Ստորին Սաքսոնիայից մի գործարարի` Էգոն Գերկենսի կնոջից և այդ տեղեկությունը թաքցրել Ստորին Սաքսոնիայի պատգամավորներից:
Կասկածանքերը, որ Վուլֆը գործնական կապեր ունի տեղի ձեռնարակատերերի հետ, հայտնվել էին դեռևս 2010 թվականին: Այդ ժամանակ Վուլֆը կնոջ հետ Ֆլորիդա էր մեկնել` Սուրբ Ծննդյան տոներն անցկացնելու, ընդ որում՝ չվճարելով տոմսի ամբողջ գումարը: Ֆլորիդայում նրանք հանգստացել են Գերկենսի առաձնատանը:
Դրանից հետո «Կանաչների» կուսակցության երկու պատգամավոր՝ Շտեֆան Վենցելը և Ուրսուլա Հելմհոլդը Վուլֆից բացատրություն էին պահանջել: Վերջինս հայտարարել է, որ իր և գործարարի միջև վերջին տասը տարում գործնական հարաբերություններ չեն եղել: Սակայն, ինչպես նշում է պարբերականը, Վուլֆն այդ ժամանակ գործնական հարաբերություններ ուներ Գերկենսի կնոջ հետ:
2008 թվականին Էդիթ Գերկենսը և Վուլֆ ամուսինները վարկային պայմանագիր էին կնքել: Վերցրած վարկով Վուլֆը գնել է տուն և 658 քառակուսի մետր հողատարածք: Այդ վարկի շնորհիվ Ստորին Սաքսոնիայի այդ ժամանակվա վարչապետը վճարում էր ոչ թե հինգ տոկոս հիպոթեքային վարկ, այլ չորս տոկոս: Էգոն Գերկենսին գերմանական մամուլում անվանում են ներկայիս նախագահի մոտ ընկերը, նա նույնիսկ Վուլֆի առաջին ամուսնության վկան է եղել:
